ofuringa

Dagurinn í dag

2010-04-13T19:17:00.003Z

Núna er kominn sumartími í Stokkhólmi og fleiri löndum sem hafa þann lúxus að kunna að breyta klukkunum sínum þegar við á. Það er reyndar svolítið síðan, en ég hef bara ekki haft það í mér síðustu daga eða vikur að skrifa eitthvað um það.
Mér finnst sumartíminn góður. Allt í einu er orðið bjart frameftir öllu og maður er ekki í endalausu sleni á kvöldin.
Eini gallinn við þetta er að nú er ég tveimur tímum á eftir Íslandi. Þannig að þegar klukkan er um átta á Íslandi og allir að fara að tengja sig á skæpið, er klukkan tíu hjá mér og ég farin að spá í að loka tölvunni. Þetta gerir það að verkum að ég hitti aldrei neinn á skæp og tala því alveg voðalega lítið í símann/tölvuna.

Ég ætla því að reyna að vera duglegri að blogga, svo fólk viti hvað ég er að gera.
Í dag var sól. Ég sá maura og feitar humlur. Ég drakk kaffi úti. Ég fékk smá handleiðslu hjá handleiðaranum mínum (handledning hos handledaren). Ég borðaði tvö steikt egg og salat í kvöldmatinn. Það var gott.

Tilviljanir?

2010-03-26T15:53:00.003Z

Hringdi í LÍN í dag. Var pínu kvíðin, því fyrir ári síðan neyddist ég til að hringja útaf sama efni, þ.e. útborgun lána fyrir haustönn. Ég fékk þá mikla skömm í hattinn fyrir að ég hefði nú átt að vera löngu búin að senda þetta (staðfestingu á námsárangri) til þeirra og þau gætu ekki tekið ábyrgð á því. Ég var nú ekkert að stressa mig á að fá þetta útborgað, bara að athuga hvort þau hefðu ekki örugglega fengið gögnin send. Þjónustufulltrúinn sagði þetta alveg típískt fyrir námsmenn erlendis að senda inn árangur á öllum tímum svo erfiðara væri fyrir þá hjá LÍN að afgreiða allt á sama tíma. Ég var pínu skelkuð eftir þetta viðmót og hef því reynt að hafa sem allra minnstu samskipti við þau.
Ég hringdi svo í dag aftur til að athuga hvort þau hefðu ekki örugglega fengið faxið frá mér í gær. Ég var búin að búa mig undir að vera ofsalega ákveðin og hörð og var með ræðu undirbúna ef ég fengi yfir mig alla streytu lífsins frá þjónustufulltrúanum. Í staðinn svaraði glaðleg rödd og sagði mér að þau hefðu mótekið einingarnar og allt væri í himnalagi. Sagði einnig að það væri svo frábært að fá námsáranginn sendan svona dreift yfir önnina, en það væri nú samt voða gaman í byrjun ársins þegar allar einingarnar væru að streyma inn og mikið að gera í vinnunni.
Ég var orðlaus. Gat ekki komið út úr mér einu aukateknu orði.
Það kom svo í ljós að það hefði ekki verið stofnað fyrir mig nýtt skuldabréf, eftir einhverja lagabreytingu á Alþingi (sem ég vissi ekki um). Þá hélt ég að ég fengi nú að heyra það fyrir að hafa aldrei minnt á að fá nýtt skuldabréf. En nei, konan sagði þetta klaufaskap af sjóðnum og bað mig innilega afsökunnar, hún skildi senda það hið snarasta til mömmu minnar sem gæti undirritað og sent bréfið til baka, svo ég fengi nú lánin mín greidd út fyrir páska. Ég var kölluð "elskan" í sífellu og svo endaði samtalið á ég mér voru boðnir gleðilegir páskar.

Nú spyr ég: hvað er í gangi á Íslandi? Eldgos, bruni í miðborginni, börn fá ekki að fara í ljós lengur og nú má enginn dansa berrassaður og svo fær maður viðkunnaleg viðmót hjá LÍN. Er þetta tilviljun?

Svona af því að ég er stödd á bókasafninu...

2010-02-05T14:09:00.002Z

...og að lesa námsefni, þá langar mig að skrifa örfáar línur. Er búin að skoða allt á feisbúkk og lesa smá Kristján Eldjárn og sitthvað fleira. Núna ætla ég að veita Blogger smá athygli.
Er líka að spá í að taka til í tenglalistanum mínum. Fólk bloggar ekki lengur. Það er ekki í tísku. Hér í Svíþjóð eru bloggarar ennþá pínu í tísku. Það eru til blogg verðlaun og fólk verður pínu upp með sér ef það sér einhvern frægan bloggara úti á götu, en hneikslast þó um leið, því svona bloggarar eru svo halló.

Skólamál eru voða mikið hangandi í loftinu. Ég er búin með alla kúrsa og er því bara að skrifa núna. Það er rosalega óþægilegt þar sem ég þarf aldrei að mæta neitt og ræð tíma mínum alveg sjálf. Ég er með engan sjálfsaga og minna til svo janúari, vini mínum tókst bara að læðast í burtu frá mér...frekar vandræðalegt, en febrúar fer ekki fet...hence the bókasafn. Ég verð að klára þessa mastersgráðu í vor og finna mér vinnu. Maður veit ekkert hvernig þessi kreppa fer með fornleifarannsóknir og atómgleipnimælingar (of töff orð), en ekki dugir að skæla Sigríður mín.

Óskar ákvað að gefa mér mjög snemmbúna afmælisgjöf þetta árið. Ég var búin tala svo mikið um að kaupa mér skauta að hann ákvað bara að splæsa þeim á mig. Ég fór og mátaði og fann mér ágætt par í Intersport. Af því að það gekk eitthvað brösulega síðast, ákvað ég að splæsa á mig hnjáhlífum líka...held að það hafi verið góð fjárfesting. Ætti eiginlega að finna mér hjálm líka.
Við Gugga kíktum í Kungsträdgården í gær og prufuðum skautana og það gekk bara ágætlega. Ég fór ofur varlega og var ekki töff, en kannski eftir nokkur skipti næ ég að þjálfa það eitthvað upp.
Tek þá með mér myndavél, svo fólk geti nú dáðst að mér.

Myndir frá nóv, des og jan.

2010-01-21T23:18:00.002Z

http://picasaweb.google.com/ingahlin

Var að setja inn 3 ný albúm. Nóvember, desember og janúar. Var så goda!!

Tilkynningaskyldan...

2010-01-15T22:24:00.002Z

Ég er löngu komin heim frá Köben! Langt síðan!
Fórum til Skánar þann 3. janúar og vorum þar að kúldrast í kuldanum til 7.janúar. Þá tók ég lestina til Stokkhólms. Ég varð svolítið hissa á tilfinningunni sem ég fékk þegar ég kom loksins (eftir klukkutíma seinkunn á lestinni) til Stokkó. Það var svona: "aaahhhh...komin heeeeiiiim". Voða undarlegt en smá notalegt.

Óskar renndi svo í hlað á InterCity lestinni sinni á afmælisdaginn, 12.
Við erum eitthvað að þykjast vera voða dugleg að læra og gera hluti, en erum í raun og veru kannski ekkert svo dugleg. Drekkum bara rauðvín úr fernu og erum frekar sjoppuleg. Ekki segja samt neinum, þetta er rosa leindó!

Verð svo að fara að setja inn myndir. Þetta er samt það sama og með lærdóminn...er bara ekki svo dugleg.
Það er samt alveg óóótrúlegt að sjá Stokkhólm í klakaböndum. Þið fáið kannski að sjá bráðum.

Kóngsins köbenhavn!

2009-12-20T13:53:00.005Z

Það gekk allt eins og í sögu í gær, þrátt fyrir ótrúlegt fannfergi! Haldfangið á töskunni minni er bilað þannig að ég þurfti að dragslast með töskuna á eftir mér, safnandi risa snjósköflum á undan henni...þetta hefur verið frekar fyndin sjón!

En ég er allavega komin til Kaupmannahafnar. Þar biðu mín Óskar, Gummi og Gulla. Við erum með lánað hús yfir hátíðarnar...og pössum í leiðinni litla Silky terrier tík. Hún er agalegur vælukjói, en samt pínu skemmtileg.

Svo er hún alveg agalega snoppufríð og alger knúsikelling

Ég er svo búin að sitja sveitt við að skrifa jólakort, sem fara í póst á morgun...koma semsagt til Íslands einhverntíma í kringum nýárið!

Saenskt lyklabord

2009-12-18T11:43:00.002Z

Hér vantar nokkra íslenska stafi á lyklabordid svo thid verdid ad vanda lesturinn!

Ég er í skólanum ad keyra í gegn sídustu greiningarnar mínar fyrir jól. Thá á ég lítid annad eftir en ad skrifa thessa blessudu ritgerd mína. Thad verdur pínu notalegt ad losna vid alla thessa sýruvinnu...thótt thad sé ótrúlega töff ad vera í hvítum slopp ad vinna med stórhaettulegar sýrur allan daginn!! Thad verdur bara gaman ad fara ad sjá einhverjar nidurstödur af thessari vinnu minni.

Hef verid í vandraedum med íslenskt heiti yfir greiningarnar sem ég geri og einnig taekid sem ég nota.
Komst ad thví í vor ad thetta eru alls ekki sporefni sem ég er ad greina heldur snefilefni...thad meikadi miklu meiri sens. Taekid kallast á ensku atomabsorptionspectrophotometer og er stytt sem AAS. Tungubrjótur? Fann á heimasídu Nýsköpunarmidstödvar Íslands ad thetta merkilega taeki heitir uppá íslensku atómgleypnimaelir. Mun betra ekki satt?

Í kvöld aetla ég ad pakka mínu hafurtaski saman, thví á morgun fer ég sudur til Köben. Er komin med hús og hund og fjölskyldu thar sem bídur mín á hovedbanhof um midnaetti annad kvöld. Hyggeligt!

Startadi í vikunni alveg nýrri jólahefd sem ég vonast til ad geta fylgt eftir naestu árin.
Jólasíld!
Hér er enginn madur med mönnum nema hann/hún marineri sína eigin síld um jólin. Ég gat ekki látid í minnipokann og er nú búin ad legga einhver reidinnar bísn af síld í Tequila/lime marineringu.
Thetta var vodalega lítid mál. Gaeti hins vegar ordid svolítid meira mál á Íslandi...kannski erfitt ad verda sé út um inläggnings sill...eller hur?
Ef hún heppnast vel, set ég kannski uppskriftina hingad inn.

Heyrumst frá Köben naest :)

Gleðilega Lúsíu!

2009-12-13T13:09:00.001Z

Er tíminn kominn??

2009-11-25T17:53:00.002Z

Voruði farin að bíða?? Já var það ekki...

Ég er ekki alveg að fíla Nóvember...það er klárlega ekki uppáhalds mánuðurinn minn. Svo finnst mér janúar og febrúar ekkert spes heldur. Væri alveg til í að leggjast í hýði þessa mánuði. Vakna rétt til að halda uppá jólin og sofna svo aftur. Það er til leikkona í henni Ameríku sem heitir January Jones. Foreldrum hennar hefur örugglega leiðst þetta barn voðalega mikið. En annars er nú kominn 25. nóvember núna svo þetta fer allt að skána...desember er ætíð upplífgandi.

Svo er svo mikið í kalenderinu mínu (já ég bý í Svíþjóð og þarf því að eiga kalender) að ég hef engan tíma til að láta mér leiðast.
Ég var í Lundi og Köben um síðustu helgi og skemmti mér konunglega. Enda ekki annað hægt með gestgjafana á þeim bæjunum.
Nokkrar fósturlandsins freyjur ætla að vera hér í Stokkhólmi um helgina og ég ætla að stússast eitthvað með þeim. Sjá t.d. The Sonics (einhverjir gamlir refir) á tónleikum. Svo ætlum við að kíkja á Salvador Dali sýningu svo fátt eitt sé nefnt.
Svo ætla ég á ballettsýningu (Hnotubrjótinn) í sænsku óperunni í næstu viku. Svo byrjar jólaundirbúningur og verkefnaskrif. Þið sjáið sumsé núna nauðsynina í því að eiga gott kalender...það er hverrar krónu virði!

Ég lofa að skrifa meira fljótlega. Á eftir að segja frá jarðvegssýnavinnunni minni sem ég er farin að sjá fyrir endann á og mörgu öðru...það má líka alveg minna mig á það hér í kommentunum...

Bakarameistari!

2009-11-03T19:02:00.003Z

Ég er klaufi við bakstur. Það er eitthvað með mig og mæliskeiðar sem á ekki saman og svo er eins og ég missi allt common sense þegar ég fer að hræra deig.
Ég kann alveg að baka nokkrar uppskriftir, en þá liggja yfirleitt nokkrar misheppnaðar tilraunir að baki!

Í kvöld var ég með agalega sæta tönn. Svo hræðilega að ég var farin að hugsa um að stökkva út í tunnel og fara niðrá söder...bara til að fá mér gómsæta sneið af kladdköku á Muggen. Hugsaði þetta í smá tíma og komst svo að þeirri niðurstöðu að það væri miklu sniðugra að finna bara uppskrift að einfaldrii kladdköku, sem er sænska, einfalda útgáfan af franskri súkkulaðiköku og baka!
Þegar ég var búin að hræra þetta deig saman (bara fáránlegt deig...eiginlega bara smjör, sykur og kakó) fattaði ég það að ég ætti ekkert kökuform. Þá hefðu flestir ákveðið að fara og finna sér kökuform því annað væri ómögulegt. En ekki ég ónei. Mér fannst alveg bráðupplagt að smyrja bara deiginu beint á bökunarpappír...svona eins og mamma gerir við marensinn...það hlýtur að virka! Ég meina deigið var ofsa þykkt og allt!
Eftir korter ákvað ég að kíkja í ofninn :o/ það sem átti að vera smurt yfir 1/4 af bökunarplötu var búið að dreifa sér yfir nánast alla plötuna!! Örþunnn kladdkakan var svo tekin úr ofninum og látin kólna. Núna sit ég og hristist af sykursjokki.

Sofna ekki í bráð og sætu tönninni reddað!

Mánuði síðar...

2009-10-27T19:27:00.004Z

Þegar svona langt líður milli færslna verður maður hálfpartinn feiminn við að skrá sig inn og skrifa eitthvað. Þarf samt ekki að skrifa allt það sem búið er að gerast í hárnákvæmri tímalínu...það væri einum of.
Í stuttu máli fór ég til Lundar í heimsókn til Óskars, fór til Västra Öster Götalands og svo kom Óskar í heimsókn um síðustu helgi. Svo er það nottla skólinn. Var að skila af mér feltkúrsinum í síðustu viku og get nú loks frjálst um höfuð strokið.
Myndir koma inn fyrr en varir.

Ég lét loksins verða af því að kaupa mér myndavél. Er búin að taka myndir á 2mp myndavelina á símanum mínum síðustu 2 árin og allt í einu fékk ég nóg. Ég var svo ógurlega ánægð með Ricoh vélina sem ég átti þá að ég ákvað að kaupa aðra: Ricoh R10 að þessu sinni...bronslita. Og nú skal taka myndir!!

(sjáið bara hvað hún er flink)

Við erum búin að ákveða að eyða jólunum í útlöndum og er Köben einn heitasti jólaleyfisdvalarstaðurinn norðan Antartica um þessar mundir. Þar er allt sem hugurinn girnist: Tívolí, Candy floss og villisvínasteikur, svo ekki sé minnst á leverpostej og hvidöl (hér fæst ekkert hvidöl)...svona það sem manni langar mest í á jólum. Foreldrar Óskars ætla að öllum líkindum að vera með okkur og okkur vantar því 3ja herbergja íbúð til leigu í Köben yfir jólin. Spread the word!

Ætla núna að drífa inn myndir...fylgist með!

*Öppdeit - Myndir komnar inn*

NÚNA er uppgraftarvertíð lokið!

2009-09-27T12:38:00.002Z

Núna er ég hætt að grafa. Í bili. Ætla samt ekki að grafa upp nokkurn skapaðan hlut í nokkra mánuði. Hef enga lyst á útiveru, pikknikki eða nokkur sem krefst þess af mér að ég sé úti undir berum himni lengur en í klukkutíma. Fimm mánuðir af árinu nægja alveg fyrir mig. Fer aftur út í vor!

Uppgröfturinn endaði þó á mjög skemmtilegum nótum! Fundum gröf sem við Gugga fengum að hreinsa fram. Enda alveg grænar í þeim efnum. Svo ákvað uppgraftarstjórinn að fagna með að bjóða okkur í búblí. Settumst á veitingastað og byrjuðum á einni flösku af ofsagóðu freyðivíni. Þegar við fórum þaðan, nokkrum tímum seinna hafði þessi flaska óvart breyst í rúma flösku á mann...svo það tók svolítið á að vakna daginn eftir til að fara og fylla uppí holuna. Note to self: ekki drekka búblí kvöldið fyrir síðasta uppgraftardag...

Er búin að setja inn myndir í Myndir 1...ágúst og september. Þar ber að líta m.a. myndir úr uppgreftinum.

Svínakjöt...fullt af því!

2009-09-20T17:47:00.003Z

Veðurblíðan heldur áfram í Stokkhólmi. Hún má alveg halda áfram eitthvað frameftir vetri fyrir mér...ég þarf engan vetur! Það verður samt gaman að fara á skauta aftur...með hnjáhlífar í þetta skiptið.

Ég gerði þau svakalegu innkaup í dag að versla mér tvö og hálft kóló af svínakótilettum! Já tvö og hálft kíló í svona risastórum fjölskyldupakkningum, sérhönnuðum fyrir fólk sem á 7 börn og risastóran ísskáp. Ég á eina hillu í ísskáp og eina hillu í frysti. En ég varð bara að nýta mér þetta svakalega tilboð - 39.90 SEK/kg. Það er alltaf bara kjúklingur sem er svona ódýr og ég er bara ekkert mikið fyrir hann þökk sé Tveim Húsvögnum.
Ég skipti þessu bara niður í hæfilega parta og setti í frystinn. Er ég ekki hagsýn húsmóðir? Það finnst mér! Núna á ég líka svínakjöt út árið :)

Svo eru komnar í búðir núna nýuppteknar rauðbeður. Langar alveg agalega að gera mér súpu...er einhver með góða uppskrift að rauðbeðusúpu? Ég skal lofa að borða hana ekki hvítklædd :)

Ég hugsa oft um það að blogga meira, nóg sé ég af nýju stöffi daglega til að skaffa mér bloggfærslur, en þegar ég kem heim úr uppgrefti orka ég bara hreinlega ekki neitt. Tek gömlu konuna á þetta og er yfirleitt sofnuð uppúr tíu. Ég er samt búin að finna voðalega fína hluti í þessum uppgrefti eins og örvarodd, fullt af fínu keramiki, nánast heilan mínípott, litlu stærri en fingurbjörg og núna eru farnir að koma í ljós einhverjir strúktúrar. Ég sagði í síðustu færslu að þetta væru 2-3000 ára gamlar minjar. Ég var alveg way off því þetta eru 5000 ára gamlar minjar sem þarna liggja. Ótrúlegt alveg!

Gæðablóð á hlaðborði

2009-09-04T18:40:00.006Z

Það er kominn september og hitinn fer lækkandi í samræmi við það...15°C er bara ekki nógu gott. Skólinn er byrjaður og það fyrsta á dagskrá er feltkúrs allan septembermánuð. Tilgangur minn í þessum kúrs virðist helst liggja í því að sjá mýflugum og slíkum skepnum fyrir næringu svo þær geti nú eignast sín börn og dáið svo í friði og ró. Á meðan þær liggja og sjúga úr ystu húðlögum mínum (helst á enni og augnlokum því það er svo smart) það gæðablóð sem þar er að finna hef ég tækifæri til að kynna mér steinaldarminjar og rannsóknir á þeim.

Korsnäs heitir staðurinn og var uppgötvaður um 1930. Hann tilheyrir pitted-ware culture og þess konar keramik finnst einmitt þarna í massavís (við hreinlega höfum ekki undan að skrifa fundanr.). Þarna er líka að finna grafir, dýra og mannabein á víð og dreif og einhverjar leirfígúrur. En enga strúktúra...dularfullur staður. Ég veit ekkert hvað er í gangi. Við erum samt að læra um þetta allt saman.
Ég hef alltaf haldið því fram að steinöld heilli mig ekki vitundar-agnar-ögn en það er eitthvað heillandi við þá tilhugsun að maður sé að moka einhverju upp sem var síðast notað fyrir ca 2000-3000 árum. Þetta er líka svolítið eins og byrja alveg uppá nýtt að grafa. Í fyrsta lagi erum við að nota aðferðir sem ég hef ekki notað áður (single context en samt einhvernveginn í plani ef þið hafið áhuga) og svo er gripaflóran eitthvað sem ég hef ekki hundsvit á og þarf að spyrja um hvern einasta stein sem ég finn, leiðbeinandanum örugglega til mikillar gleði. Svolítið eins og þegar við vorum að fylla gripaföturnar af rótum við sigtunina á Hólum!

Um leið og við lyftum grasrótinni fóru að koma keramik brot. Þetta var fyrsta brotið mitt:

Frekar kúl...

Við höfum svaka öflugt sigti til afnota...örugglega það notendavænsta sem ég hef notað:

og annað ekki svo öflugt...en það dugar fínt:

Þetta er voða gaman...fyrir utan það að ég þarf að fara á fætur kl 6...þeir sem til þekkja ættu að átta sig á því að það getur reynt á.

Myndir!

2009-08-29T12:50:00.001Z

4 ný albúm á http://picasaweb.google.com/ingahlin

Apríl, maí, júní och júlí...njótið vel.

Internet!!!

2009-08-27T17:12:00.002Z

Hérna er ég...live úr herberginu mínu á Lappis!

Fór í smá ferðalag í dag (sjá umföllun neðar) og þegar ég kom heim biðu mín í póstinum leiðbeiningar um það hvernig ætti að setja upp internetið. Það var ekkert mál. Ég var bara búin að vera svo handóð og óþolinmóð að ég var búin að færa allt til í nettenginunum mínum...nú er þetta mega flott!

Ég er sumsé búin að koma mér fyrir. Þarf samt eina ferð í viðbót til að kaupa mér ýmislegt sem gleymdist í IKEA um daginn. Ætla að reyna að finna það í hjálpræðishernum, annars IKEA. Herbergið mitt er rúmgott og fínt, með ágætis mublum og ég hef mitt eigið baðherbergi. Eldhúsinu er deilt með 10 öðrum íbúum á ganginum og það verður að teljast vægast sagt ógeðslegt. Held jafnvel að það hafi ekki verið þrifið hérna síðan um jól! Lyktar eins og ég veit ekki hvað! Það verður húsfundur á sunnudaginn og þá verða þrifin vonandi skipulögð eitthvað.
Er annars búin að sækja allt draslið mitt sem ég skildi eftir hérna í vor og er búin að vera að drepast úr vöðvaverkjum eftir burðinn...dópa mig bara pínulítið upp og þá lagast það.
Það versta var að þegar við Gugga vorum nýlentar á háskólasvæðinu eftir að hafa burðast með tonn af drasli sá Gugga að hún var ekki með veskið sitt! Það hafði þá horfið í tunnelbananum með öllum hennar peningum, kortum, lyklum og vegabréfi. Hún fékk sem betur fer mikla hjálp frá starfsmanninum á lestarstöðinni og það er búið að tilkynna þetta allt en nóttinni þurfti hún að eyða hjá mér á skítugri dýnu sem var skilin eftir í herberginu, innan í sængurverinu sínu sem hún var nýbúin að sækja til fyrrum leigusala. Miður skemmtilegt...
Þetta reddast þó allt með smá veseni og fjárútlátum. Veskan fæst þó ekki bætt, þar sem þetta var sú eina sinnar tegundar...leiðindi leiðindi!

En að skemmtilegri hlutum! Ég hef sagt öllum sem hafa nennt að hlusta að lokaverkefnið mitt mun fjalla um hús í Birka (nenni ekki að pikka allt inn aftur). En í dag fórum við með leiðbeinandanum í siglingu á sjálfan staðinn! Við sigldum í ca einn og hálfan tíma inn í Skerjagarðinn til eyjarinnar Björkö, þar sem Birka er. Við röltum um og fengum leiðsögn hjá Lenu sem veit náttúrlega allt um staðinn, hefur grafið þar í áraraðir. Fengum æðislegt veður, fræddumst heilmikið og sáum voðalega fínar fornleifar og siglingin um Skerjagarðinn var frábær...gegt alveg!

En jáh...þetta var svolítið löng tilkynningaskylda...skrifa um eitthvað skemmtilegra næst...lofa!

Komin út :)

2009-08-25T09:49:00.002Z

Og ekkert internet í herberginu mínu. Veit ekki alveg hvad er med thad, en ég vona ad thetta detti inn fljótlega.
Flutt inn á Lappis (sem eru stúdentagardarnir) og fékk hid ágaetasta herbergi. Thurfti tho ad fara í Ikea strax í gaer til ad kaupa mér dýnu og adrar naudsynjar og thad tó hrikalegan tíma. Bar svo dýnuna mína um alla borg og heim í rúmid mitt. Vödvarnir mínir eru ekki sáttir.
Thad er sól, hiti, ég í kjól og stuttum leggings. Thetta er voda voda gott bara!

uppgraftarvertíð lokið í bili

2009-08-14T22:16:00.002Z

Þá er bara að bretta upp ermar og flytja út úr þessari íbúð því eftir rúma viku fer ég út! Óskar fer svo tæpri viku síðar.
Stuði stuð!

Það var hátíðleg stund á bökkum Þjórsár í lok dags þar sem vinnufélagarnir söfnuðust saman í hring og hrópuðu ferfalt húrra fyrir mér og grétu svo hástöfum af sorg yfir brottför minni. Ég skil þau vel...alltaf erfitt að kveðja. En ég kem aftur...ég kem alltaf aftur.

Á leiðinni í bæinn stoppuðum við á Selfossi til að næra okkur aðeins. Staðurinn "Grænt og Grillað eða "Greens on Wheels" (sem er nú ekki merkilegri en lítill matsöluvagn á Hafnarplaninu) varð fyrir valinu og við urðum sko ekki fyrir vonbrigðum! Æðislegt spínat buff, gróft pasta með ólífum og parmesan, æðislegt brauð og hummus og ferskt salat með iceberg, eplum, vatnsmelónu og myntu. Svo var einhver rosa góð jógúrtsósa með þessu. Amminamminamm!!! Allt svo ofsalega heilt og gott!
Fyrir vel útilátinn skammt af þessum góða mat voru rukkaðar 1290 kr sem mér finnst bara skid och ingen ting fyrir svona virkilega góðan mat.
Mæli með fyrir fólk á leið um Selfoss (og að sjálfsögðu fólk búsett á svæðinu) að láta þetta ekki framhjá sér fara...allir á "Greens on Wheels"!!

Allt að smella saman.

2009-07-23T21:06:00.002Z

Núna er ég komin í kontrakt verkefnið og dúlla mér við að teikna upp rústir og moka skurði í gegnum þær. Við byrjuðum í Landsveit og eigum smá eftir þar. En skúrinn er kominn í Gnúpverjahreppinn og þar er sko gott að vera. Við þurfun að grafa smá úti í eyju einni í miðri Þjórsá og eigum einnig eftir að grafa eitthvað á hinum bakkanum og leysum það vandamál með því að þeytast yfir ána á...bíðið nú aldeilis við og haldið ykkur fast...á ZODIAC!!! Við erum bara of kúl!
Við gistum í Hálendismiðstöðinni í Hrauneyjum en komum heim um hverja helgi.

Ég er búin að gera allt reddí...svona næstum fyrir brottför til Stokkhólms. Fer þann 24. ágúst af landi brott. Fer þá beint að sækja lyklana að nýja stúdentaherberginu mínu og þaðan beint í IKEA eða JYSK til að köpa dýnu í rúmið mitt. Skólinn byrjar svo 25. ágúst af fullum krafti!
Við erum komin með leigjendur að íbúðinni. Óskar er líka kominn inn í Lundi svo það ætlar að verða að veruleika að við verðum staðsett í sama landinu næsta vetur.

Já það er gaman að'essu!

Í minningu Pílu

2009-07-19T15:31:00.003Z

Elsku Píla mín kvaddi þennan heim í gær.
Hún var náttúrlega besta kellingin og tók uppá ýmsu um sína ævidaga. Hver man ekki eftir 4 vikna ferðalaginu hennar? Svo þegar hún lenti í slag við gordon setterana og þegar hún ætlaði að borða jólasveinana á aðfangadag. Yndislegust.

Djóóóók!

2009-06-29T21:21:00.002Z

Öræfasveit var æði! Á tveim vikum fengum við bara tvo ofsaveðursdaga, aðrir dagar voru bara allt í lagi og trukkafæðið var bara vel ætt! Ég náði t.d. að labba yfir mýrina í hlýrabol einn daginn. Mjög undarlegt.
Núna er ég komin á Höfn aftur og ætla að vera í rúmar tvær vikur. Tek mér þó helgarleyfi næstu helgi til að kíkja á SV-hornið.

Baaaara svona smá pínu frétta-uppdate. Var að spá í að setja inn myndir á picasa en nenni því ekki núna.

Dekurrófa!!

2009-06-12T19:01:00.000Z

Er í Hornafirðinum. Dvel í Nesjum, en borða á Höfn...og borða... og borða! Erum örugglega best fóðraði fornleifahópur landsins. Humar, bleikja, lambakjöt og bara kjammsí kjamms...allt þetta dekur fer fram á Ósnum á Hótel Höfn og áætla ég að þessi fáeinu kreppukíló sem ég missti í vetur munu láta sjá sig á ný áður en langt um líður.

Við neyðumst til að flytja í Öræfasveitina um helgina þar sem við ætlum að grafa enn á ný á Bæ í tvær vikur. Svo verðum við á einhverju flakki tvist og bast og ég bara hreinlega veit ekki alveg hvar ég á að vera að grafa hverju sinni.
Öræfasveitin var alltaf voðalega fín og sæt, en eftir veðurofsann síðasta sumar er ég pínu smeyk við hana. Svo heillar það mig ekki að flytja úr þessu dekri í trukkafæðið :o/ Það verður spes...

Annars bara, verið hress og þarna...

Síðasti pósturinn í svíjaríki í bili...

2009-06-03T19:28:00.002Z

Tímarnir eru fljótir að líða og ekki á morgun heldur hinn legg ég af stað heim! Flutti frá Västertorp á sunnudaginn alla leið til Farsta þar sem ég dvel í góðu yfirlæti hjá Guggu. Það er búið að vera ansi erfitt síðustu daga að klára öll verkefni áður en við yfirgefum landið, en þetta er að skríða saman. Vonast til að geta klárað flest í kvöld (annað klára ég í sumar) og pakkað í fyrramálið. Þá þarf ég að skila bókum á bókasafnið, prenta út verkefnin og skila, fara í klippingu (ef ég hef tíma), fara aftur heim og græja mig fyrir sommarfest STARK, fara svo og hjálpa til í eldhúsinu á sommarfest...já svo var ég víst búin að lofa Jonathan að detta rækilega í'ða! Fjúff...held að ég fari bara á ýmó.
Svo er það að fara og ná lestinni rúmlega 12 frá centralen. Svo er það bara Reykjavík og svo Selfoss og svo Höbbn í Hobbnafirði...heyrumst betur þá :)

"ég er ekki búin að raka á mér lappirnar svo ég vil ekki bretta upp nærbuxurnar mínar"!

2009-05-29T20:43:00.002Z

...svona er nú gaman að vera vitlaus útlendingur og tala vitlaust mál...gaman að því :D Hohohoh

Allvega. Síðasta grävölið var í kvöld, vika þangað til ég verð nýkomin til Íslands. Er að pakka! Nákvæmlega eftir viku ætla ég að hafa það svoooo kósí á Holtsgötunni minni með Óskarinum mínum :)

Va'fan de är skönt!!

Rétt rúm vika!!

2009-05-26T15:46:00.003Z

Á föstudaginn í næstu viku (nánar tiltekið þann 5. júní nk) mæti ég á leifsstöð :) Ég er með pínu fiðrildi í maganum. Get ekki beðið eftir að koma heim en það er líka smá stress því það þarf að gera svoooo mikið svo við komum nú íbúðinni í leigu...Óskar er neflilega búinn að sækja um í Lundi. Ætlum að búa í sama landinu næsta vetur ja svei mér þá! Flestar helgar í sumar fara því í húshaldsvesen.
En svo er þetta kannski ekkert mikið og ég kannski að gera úlfalda úr mýflugu, en smá stress sakar engan.

Það gengur vel í uppgrefti. Við Gugga erum samt eiginlega hættar að skipta okkur af þessum uppgrefti þar sem það er alveg feikinóg að gera í fosfatsýnunum.
Ég hef ekki verið bitin af þessum kvikindum hingað til, en mýflugurnar elska mig útaf lífinu. Alltaf notalegt að vera elskuð af einhverjum, enn notalegra ef það klæjaði ekki svona undan elskulegheitunum.
Veðrið leikur við hvern sinn fingur núna og ég ætti í rauninni bara að hanga í einhverjum almenningsgörðum og sóla mig...en ég þarf að klára verkefni og hugsa líka að íslenska sumarið verði svo gott að ég þurfi engar áhyggjur að hafa af sólarleysi...hmmmmm...
Næstu helgi flyt ég svo úr rauðu holunni minni og verð hjá Guggu síðustu næturnar áður en ég kem heim.

Ætla sko beinustu leið í Vesturbæjarlaug þegar ég kem í bæinn! Og fá mér appelsín í gleri :)

ps...Anna í Grænuhlíð eldist vel :)

Með vind í hárinu...

2009-05-16T17:28:00.002Z

Óskar kom í stutta heimsókn um síðustu helgi :) Það var ógurlega notalegt að fá hann og gerðum við alveg talsvert. Fórum í búðir, fórum á safn, fórum í partý, grilluðum, röltum um og leiddumst...agalega væmið allt saman :) Svo er ég að koma heim eftir 19 daga!! Hlakka bara smá til, en verð samt að ljúka öllum verkefnum fyrst svo ég má ekki hugsa of mikið um þetta.

Er á leiðinni í júrópartý! Búin að fara í bleikar leggings og spreyja vind í hárið svo ég ætti að vera gúd tú gó!

Ég er að vonast til að Portúgal vinni í kvöld...ofsalega krúttlegt atriði þar á ferð. Þeir vinna samt örugglega ekki. Ég ætla ekki að kjósa neitt...ekki einu sinni fósturlandið. Fátækir námsmenn stunda ekki svoleiðis.
Ég var svolítið hissa á að við komumst uppúr undankeppninni en þegar maður heyrir hvað útlendingum (sem hafa ekki hugmynd hver þessi barnastjarna er) finnst um lagið, þá skilur maður pínu vinsældirnar. Held jafnvel að við gætum orðið í 5. - 10. sæti.
Ég leifi henni bara að fara svoooooo miiiiikiiiiið í taugarnar á mér! Og þessi kjóll?!? Hverjum datt í hug að kaupa fullt af bláum borðtuskum í rúmfó og sauma þær saman? Samfestingurinn hennar Selmu var skárri en þetta!

Jæja...andinn kom

2009-05-07T18:12:00.004Z

Í dag var aðeins betra veður svo ég nenni að skrifa eitthvað um þennan uppgröft sem ég er í. En fyrst verð ég bara að sýna ykkur hvað Gugga varð glöð þegar við fundum Serrano:

En þetta er sumsé feltkúrs fyrir master-, magister- og fyrsta árs nema í almennri-, laboratoriv- og beinafornleifafræði. Við gröfum á stað sem heitir Karsvik og er með alls kyns fornleifar. Á svæðinu mínu er verið að grafa í húsgrunni (terrass) sem er ýmist víkingaaldar- eða snemmjárnaldarhús...fer eftir því hvern maður spyr. Svo er verið að grafa á öðrum stað í einhverju sem kallast Platåhus sem er miðaldadæmi og að sögn eins kennarans víkingaaldar baðlaug. Svo er á öðrum stað verið að grafa í einhverju sem ekki er alveg fullkomlega vitað hvað er enn, en að sumra mati er þar bronsaldar cairn (veit ekki ísl. orðið). Á enn öðrum stað...svolítið lengra frá okkur er svo verið að grafa í kringum rúnastein til að athuga með einhverjar mannaathafnir í kringum steininn. Allavega. Við Gugga erum náttúrlega spesjalistarnir af labbinu svo við svörum fyrir allar sýnatökur og eigum að ráðleggja (svolítið óþægilegt en lærdómsríkt) og við höfum verið að taka fosfatsýni í húsgrunninum sem við eigum svo að greina á morgun. Hér eru alltaf tekin fosfatsýni á hverjum meter til að gera karteringu yfir svæðið...þá á maður að sjá sirka hvernig húsið lítur út og hvort einhver dýr hafi verið haldin þar. Við höfum eitthvað fengið að grafa líka en eftir að hafa fundið rautt endurskinsmerki og galvaniseraðan nagla ákváðum við að reyna bara að taka meiri sýni :)
Það er voða undarlegt að grafa svona inní skógi. Ekkert þurfti að aftyrfa...bara raka laufum af terrassinu og klippa runna í burtu. Svo koma mannvistarlögin í ljós rétt undir sverði og maður er stanslaust með garðklippur að klippa rætur...eitthvað nýtt.
Það hefur verið frekar kalt hjá okkur. Í gær hitnaði svo smá en endaði í hagléli...svo að ég hef ekkert nennt neinu á kvöldin. Í dag var hins vegar fínasta veður. Við Gugga fórum e-ð niðrí gám (þar sem við geymun stöffið okkar) að ná í málbönd og pinna og þegar við vorum á leiðinni aftur uppá svæði stóð dádýr fyrir framan okkur! Svona 10 metrum frá. Það er eitthvað nýtt líka. Ég var svo aldeilis hlessa að ég fattaði ekki að draga upp myndavélina, en það lét sig líka hverfa fljótlega. Eins gott því þau eru víst hlaðin TBE smituðum blóðmaurum :o/
Svo var verið að skoða einhvern stóran stein sem grunur lék á að gæti verið kvarnarsteinn í lok dagsins. Þegar honum var velt sat þar risa froskur. Ég ákvað þá að draga upp myndavélina og smella einni af prinsinum:

fjúff...

2009-05-06T19:45:00.002Z

Ég hef alveg helling að segja og gæti bloggað alveg ótrúlega langt blogg, en ég er byrjuð að grafa núna og kvöldin fara í að klára stöff og græja og gera áður en Óskar kemur í heimsókn á föstudaginn. Svo er ég frekar andlaus eftir súrefnisskammtinn á daginn. Fengum haglél og úrhelli seinni partinn í dag og hættum seinna svo við skruppum í Vällingby (sem er hverfi lengst í rassgati) og fengum okkur Serrano!!! Jebb...það er hægt að fá sér ektagóðan Serrano í Stokkhólmi...ljúffengt!

Blogga meira þegar andinn kemur yfir mig.

Hitabeltið...

2009-04-29T19:11:00.003Z

Fór á Naturhistoriska safnið í dag og sá sýningu sem kallast Rainbow animals. Hún fjallar um rannsóknir á kynhneigð dýra og er alveg svakalega áhugaverð. Mér fannst mest fyndið að lesa um það að vísindamenn hafa markvisst verið að leyna því eða líta framhjá því að dýr heigist til sama kyns, þótt að kynferði og mökunaratferli hafi milljón sinnum verið skoðað. En samkynhneigð finnst í öllum dýrategundum. Það var t.d. fjallað um mávapar sem voru hommar og stálu eggjum frá mávakellingum til að ala upp...mar reddar sér!

Annars ætlaði ég nú að vera löngu búin að blogga og segja frá helginni minni. Fór neflilega í ferðalag með íslensku stúdentunum hérna í Skerjagarðinn og vorum við þar eina nótt í húsi sem KTH á(annar háskóli en minn í Stokkhólmi). Það var ofsa ofsa gaman. Grilluðum og drukkum, kveiktum varðeld og sungum og drukkum smá meira og fórum svo í sánuna...það er ekkert voða sniðugt að drekka mikið áfengi og vera lengi í sánu. Maður þornar mjög mikið upp og timburmennirnir verða alveg agalegir. Það var samt 20°C þegar við komum aftur til Stokkhólms á laugardeginum svo við Gugga fórum niðrí bæ og fengum okkur þynnkumat og settumst svo við Strömmen og sóluðum okkur.
Æðislegur kjördagur!
Fylgdist svo með fyrstu tölum og vaknaði um morguninn og sá síðustu tölur...skemmtilegur tímamunur. Vinstri stjórn ha? Þetta verður spennandi.
Ég skildi ekki alveg þetta sem koma fram að það að samfylkingin fengi svona mikla kosningu þýði að allir vilji fara í EB. Getur einhver útskýrt fyrir mér kostina við að fara í EB? Ég bara sé ekki eina einustu! Vitiði hvað er mikið atvinnuleysi t.d. í EB löndum? Þetta er engin töfralausn eins og fólk talar um. Er bara ekki að fatta af hverju fólk er að eyða tíma í að velta þessu fyrir sér.

En jáh...nóg um pólitík. Fór í bólusetningu í dag. Fór neflilega í vettvangsferð í gær á staðinn sem við eigum að grafa á í maí og var sagt að blóðmaurarnir væru mættir á svæðið og það væri því nauðsynlegt að fara í bólusetningu...WHAT? Þegar ég spurði frekar útí þetta er Stokkhólmssvæðið eitt það hættulegasta í heiminum fyrir sjúkdóm sem kallast TBE (tick borne encephalitis). Ef maður sýkist af honum getur maður fengið heilabólgu og lamast takk fyrir og þetta berst með blóðmaurunum. En ég er búin að fara í sprautuna og fer svo aftur eftir 2 vikur og þá er ég seif. Það fara flestir hérna í bólusetningu en samt greinast um 150 tilfelli á ári af TBE! Svo þótt maður fari í bólusetningu getur maður smitast að öðrum sjúkdómi (borrelia heitir hann) frá þessum kvikindum en hann er hægt að lækna með fúkkalyfjum. Jáh saklausa Skandinavía. Svo eru hérna eitraðir snákar líka! Svona er þetta í hitabeltinu...

...það er einmitt búið að vera um 17°-20°C alla vikuna ;o)

Liksom...

2009-04-20T16:11:00.002Z

Ég varð þess heiðurs aðnjótandi að fá að hlusta á samtal sem strákurinn sem sat á móti mér í lestinni átti við kærustuna sína. Hún vildi greinilega að hann flytti inn til sín en honum fannst það ferlega erfið tilhugsun því að hún á barn. Hún lifir líka svo skipulögðu lífi. Vaknar á morgnanna og borðar morgunmat með barninu og fer svo í vinnuna, en hann vill helst bara fá sér samloku og setjast fyrir framan sjónvarpið. Því það virkar faktískt bara fínt. En honum fannst samt gaman að hanga með þessari kærustu sinni og fannst sjálfsagt að þau myndu byrja að búa saman því þau eyða víst öllum stundum saman. En vildi þó tjá hvað honum fannst erfitt að hún ætti barn. Hann endaði allar setningar á orðinu "liksom" sem gerði þetta samtal ennþá áhugaverðara. Fólkið í kring lagði greinilega líka hlustir við því undir lokin voru allir farnir að brosa í kampinn og flissa yfir öllu þessu "liksom". Skemmtilegt.

Fór annars að kjósa í sendiráðinu í hádeginu eins og ábyrgum ríkisborgara sæmir. Kaus rétt svo að þetta vesen á Íslandi ætti að fara að lagast...svo lengi sem þið kjósið líka rétt!
Fór líka í sjúkrþjálfun og lét pína mig svolítið. Henni fannst þó að ég hafði bólgnað svolítið upp eftir síðasta tíma og dró aðeins úr píningunum. Gat þó staðið á öðrum fæti á svampúðanum og kastað bolta í vegg og gripið alveg 35 sinnum (með nokkrum hléum þó), svo þetta er allt að koma. Á að vera í þjálfun í alveg mánuð í viðbót og má ekki fara í miklar fjallgöngur eða stunda hlaup...

...finnst ykkur ekki líklegt?

Sjúkraþjálfari dauðans!

2009-04-16T20:05:00.002Z

Vorið er komið í Stokkhólmi og ég farin að taka tilheyrandi lyf til að sporna við öllu frjókornamagninu sem byggist núna upp dag frá degi. Það er þó ekki allt orðið grænt ennþá, en það er best að byrja snemma til að byggja upp oðnæmiskerfið (eins og það réttilega heitir).

Ég fór í sjúkraþjálfun í morgun og það gengur bara vel. Get alltaf gengið aðeins lengra í hvert skipti sem ég mæti og er dugleg að gera æfingarnar mínar heima eins og prúðum stúlkum sæmir. Sjúkraþjálfarinn minn er að verða kröfuharðari með tímanum og í morgun hélt ég að hún myndi alveg ganga fram af mér. Hún lét mig fyrst hjóla og svo fara í gegnum sömu æfingar og ég hef verið að gera, nema bætti við meiri þyngd og lét mig gera æfingarnar oftar. Svo bætti hún við nokkrum jafnvægis- og styrktaræfingum og þá kárnaði gamanið nú. Fyrsta æfingin var að standa með löskuðu löppina uppi á einhverjum bolta og beygja hnéð. Boltinn vildi náttúrlega rúlla undan mér og það tók þó nokkuð á að reyna þessa æfingu. Þótt ég væri orðin svolítið þreytt var ég næst látin standa uppá einhverjum kubb og láta mig detta á löskuðu löppina á einhverskonar trampólín og standa á því á einni löpp í flugvélastellingu og reyna að beygja hnéð eins mikið og ég gat. Ég hélt að ég myndi deyja. Var alveg búin á því en sjúkraþjálfarinn sagðist vilja prófa eina æfingu í viðbót. Ég fór bara að hlæja þegar hún sagði mér að standa ofan á svamppúða á löskuðu löppinni, beygja hnéð eins mikið og ég gæti og kasta bolta í vegg og grípa...svona 40-50 sinnum!!!! Undir venjulegum kringumstæðum ætti ég að geta staðið á annari löppinni í 90 gráðum sagði hún. Ég get það ekki einu sinni á heilbrigðri löpp! Kannski heldur hún að ég hafi einu sinni verið heimsmeistari í listhlaupi á skautum og sé bara komin í frekar slæmt form. En þetta er ekkert djók, ég var í alvöru bara að leika mér þarna í Kungsträgården og hef aldrei verið í neitt sérstaklega góðu formi. Ég reyndi nokkrum sinnum, en mistókst jafnoft. Þá leifði hún mér að gera teyjur og fara heim. Bókaði mig svo í tíma hjá sér tvisvar í næstu viku. Ég verð náttúrlega að vera komin í form fyrir næsta heimsmeistaramót.
Núna er ég með stingandi harðsperrur frá vinstri rasskinn niður í vinstri kálfa. Hægri síðan er í fínu lagi...fer létt með'etta!

En þetta er víst nauðsynlegt. Ég er jú að byrja á vettvangsnámskeiði í maí og búin að ráða mig í uppgröft heima í allt sumar og þá er betra að hafa hnéð í lagi. Svo ég ætla bara að látast vera heimsmeistari í listhlaupi á skautum í smá tíma og ganga aðeins fram af mér.
Svona var ég nú einu sinni klár:

Don't mess with me, I'm an archaeologist!

2009-04-11T14:25:00.002Z

Er búin að horfa á þættina Bonekickers öðru hvoru í vetur og var núna að klára síðasta þáttinn, þar sem þessi fleyga setning kemur fyrir. Þvílík endemis vitleysa sem þetta er en samt eitthvað undarlega gaman að horfa á þetta. Mæli með að kíkja á surf the channel og horfa á þættina þar. Hvort sem þið eruð fornleifafræðinörd eður ei. Þetta á voðalega lítið skilt við fornleifafræði, en þarna koma þó allar þær stereótýpur sem við eigum að kannast við úr fornleifafræðinni fram...er búin að hlæja mikið yfir þessu, fá kjánahroll oftar en einu sinni og segja "nei heyrðu þetta er nú einum of mikil della" oftar en tíu sinnum! Góð skemmtun þrátt fyrir allt :)

Það er örugglega hitabilgja að ganga yfir Svíþjóð núna. Nema að þetta sé eðlilegt. 18°C í apríl er langt frá því að vera eðlilegt í mínum huga. Ætla alltaf að eyða páskum í Sverige héðan í frá! Fór útí búð áðan á sandölum og stuttermabol og með sólgleraugu og alles! Keypti páskaliljur og fullt af góðum mat til að háma í mig á morgun. Skagenröra, brie, baguette, soðin egg og fleira sem fátæki námsmaðurinn ákvað að láta eftir sér í tilefni páskanna! Ætla svo í mat til vinkonu minnar í kvöld. Borða sænskan páskamat og horfa á sænskar bíómyndir (þó ekki Ingmar Bergman takk fyrir pent!)!
Hér er allt opið alla páskahelgina. Þá helst á morgun að einhverjir hafa lokað en í gær rölti ég um allt og allt virtist vera opið. Enda borgin iðandi af túristum svo að það verður nú að vera e-ð að gera fyrir greyjin. Það er líka kjánalegt finnst mér að láta svona trúarhátíð vera í svona miklu fyrirrúmi í fjöltrúa samfélagi eins og Stokkhólmur er. Það fara ekki alveg allir að grenja þótt Júdas hafi svikið einhvern fyrir milljón árum síðan. Betra að sitja úti á torgum og sötra bjór.

Gleðilega Páska!!!

Íslensk stjórnmál einkennast af stockholm syndrome

2009-04-04T16:36:00.002Z

Ég er bara nokkuð sammála honum Bjarna Harðar hér og frekar svekkt yfir því að hann hafi dregið þigframboðið til baka. Ég hef neflilega ekki mikinn áhuga á því að kjósa þessa flokka sem eru búnir að skíta rækilega uppá bak á þing. Verð að finna mér annan kost.

En ég kom til baka frá Halland á fimmtudaginn. Það var ofsalega gaman að komast aðeins útá land og skoða fornleifar og fá smá vor í æðar og tók svo náttúrlega vorið með mér aftur til Stokkhólms. Í dag er 17° hiti og sól!
Við skoðuðum voðalega mikið af grafhaugum og steinsetningum, ýmist frá bronsöld eða víkingaöld og vorum við með alveg sérlegan spesjalista í þeim efnum, Tore Artelius með okkur. Við sáum líka ýmislegt annað eins og varðveitt 17. aldar þorp, virki frá miðöldum og mýrarlíkið Bockstensmannen. Svo gistum við á hosteli í Gautaborg og gátum skoðað hana smá...mjög takmarkað þó.
Hnéð mitt var frekar þreitt á þessu brölti þegar ég kom heim, en ég fór í rehab í gær og fékk ráðleggingar og fleiri æfingar að gera. Þetta tekur náttúrlega tíma að jafna sig, en það hefst!

En ég er búin að setja inn massa mikið af myndum í albúmið "myndir 1". Frá febrúar, mars og svo frá Halland ferðinni. Gjörið svo vel og kíkið!

Ferðalag...

2009-03-29T18:39:00.002Z

Fer í ferðalag með skólanum á morgun. Leggjum af stað klukkan 8 og er förinni heitið til Hallands þar sem við ætlum að flakka um í 4 daga og skoða fínar fornleifar. Gistum í Gautaborg og málum bæinn rauðann! Hlakka mikið til. Núna er ég sumsé að pakka og þvo þvott og gera klárt. Segi ferðasögu þegar ég kem til baka!

Sex vikum sídar!

2009-03-23T10:32:00.002Z

Fór til laeknis ádan, röntgen og skodun og allt leit vel út...jätte bra!
Má hédan í frá ganga um spelku og haekjulaus. Tilfinningin er voda skrítin. Svipad eins og thegar madur hefur sofid illa á handleggnum sínum og aetlar svo ad hreyfa hann daginn eftir. Svipad og thad sinnum 10. En laeknirinn sagdi ad ég yrdi ad losna vid spelkuna og fara ad thjálfa hnéd thví annars yrdi thad eins og stál...thad viljum vid ekki. Svo taldi hann upp nokkra "worst case senario" möguleika sem ég aetta ad sleppa vid ef ég verd dugleg ad aefa hnéd. Svona eins og ad ég muni aldrei fá fulla hreyfigetu í hnéd, muni alltaf vera aum í kringum hnéskelina og ad thetta hné muni alltaf vera til vandraeda í framtídinni. Svo er náttúrlega möguleiki á thvi ad ef thad kemur högg á hnéd á naestu vikum, smallist hnéskelin í spad og thá tharf ad skera...thad viljum vid alls ekki.
En ég er komin med remis á sjukgymnastik svo ad thetta á ad verda allt í thessu fínasta!
Er í skólanum núna...hence the stafsetning. Get ekki bedid eftir ad komast heim og fara í BUXUR!!!

laugardagskvöld í Stokkhólmi...

2009-03-21T18:47:00.002Z

...ætti að vera eitthvað ótrúlega skemmtilegt, en í þetta skiptið er kominn tími til að láta sér leiðast. Tveir fyrirlestrar og verkefnaskil gera það að verkum að ég eyði helginni í lestur og skrif. Það er allt í lagi. Er búin að djamma frá mér allt vit undanfarnar helgar. Það er líka farið að síga á seinnihluta mánaðarins og ég farin að elda súpur.
Það er án efa sá réttur sem ég er orðin hvað þjálfuðust í að græja eftir þennan vetur. Ótrúlega saðsamur og ódýr réttur sem grænmetissúpan er og ofsalega mörg afbriði af henni eftir því hvað er til í skápnum, svo á maður alltaf afgang sem tilvalið er að hita upp næstu daga (bara ekki í plasti...passa sig á því). Í þetta sinn voru það kartöflur, gulrætur, laukur og hvítlaukur. Bragðbætt svo með teningi, salti, pipar, cayenne, oregano, basil og slettu af philadelpha...ofsalega ofsalega gott! Ekki verra ef maður á smá brauðbita með. Ég átti tortilla pönnuköku og smurði hana með philadelphia, kryddaði svo smá og ristaði í ofninum. Svo er ég búin að liggja á hvítvínsdreitli sem varð afgangs í afmælisboðinu, sem ég sötra núna. Lúxus!

Svoleiðis er það nú...

Ég er farin að halda að það sé komið úr týsku að blogga. Mér hefur lengi fundist voðalega notalegt að skoða annarra manna blogg þegar ég á að vera að læra, en það bara bloggar enginn lengur. Mér finnst voða notalegt að skrifa einstöku sinnum og ég tala nú ekki um að skoða gömul blogg kannski 3-4 ár aftur í tímann. Hef fengið þá hugmynd að skoða bara facebook í staðinn, en það er alveg takmarkað hvað maður getur eytt löngum tíma þar inni. Er samt komin með eiginn bóndabæ þar og get eitthvað eytt tímanum þar, en samt...mig vantar blogg...komaso kæru vinir!

27 ára!?!

2009-03-15T11:30:00.004Z

Alltaf þegar ég segi þetta þá finnst mér ég vera að ljúga að fólki og ég þurfi að endurhugsa þetta aðeins. En ég er samt í alvörunni orðin 27 ára. Undarlegt en satt.

Ég átti alveg dásamlega skemmtilegan dag. Var í partýi á föstudagskvöldið og þar var afmælissöngurinn tekinn á miðnætti og svo fór ég heim (engin ástæða til að vera þarna lengur fyrst allir voru búnir að komast að því hvað ég væri gömul).
Svo vaknaði ég í gærmorgun og setti túnfisk í marineringu og bakaði pönnukökur (svona litlar þykkar lummur eins og ég fékk í Belfast). Yumiko bakaði líka pizzu svo þetta varð alveg feiknar góður brunch.
Svo fór ég í bæinn og keypti mér hrikalega sæta rauða kápu í afmælisgjöf og bara get ekki þakkað mér nógu oft. Þegar ég kom heim aftur tók svo við að skera grænmeti í tempura (svona alls konar djúpsteikt dót sem maður borðar með blöndu af rifnum hvítum radísum og sojasósu) og sushi. Svo gerðum við nokkrar rúllur með spicy tuna og nokkrar með reyktum laxi og svo eina grænmetis fyrir Guggu. Fengum svo 3 ofurþunna gesti (sem höfðu ekki farið svo snemma úr partýinu) í mat og sátum og spjölluðum og átum langt fram eftir kvöldi...ægilega fínt.

Núna er á dagskránni að gera nákvæmlega ekki neitt og slappa alveg óhugnalega mikið af, því á morgun þarf ég að skattavesenast og það finnst mér leiðinlegt að gera!
Ég er búin að kaupa mér flugmiðann heim (man ekki hvort ég var búin að segja frá því) og það verður föstudaginn 5. júní sem ég ætla að heiðra land og þjóð með komu minni. Hlakkiði ekki til?

Ég ætla að vona að þessi mynd verði ekki búin í bíó þá...langar rosa mikið að sjá hana: Tengill á mbl myndband

11. mars!!

2009-03-11T14:07:00.002Z

12 dagar þangað til að ég fer til læknis og allt verður fullkomið! 3 dagar þangað til að ég verð árinu eldri...sjitt! Ég gæti sagt að tíminn flygi áfram en í sannleikasagt þá hafa þetta verið lengstu vikur á ævi minni eftir að ég fékk þessa spelku. Mér finnst ég alltaf hafa verið með þetta drasl og finnst það vera dæmalaust langt síðan að ég fór á skauta síðast! Húff 12 dagar!

Planið á afmælinu mínu er að vakna og fá mér einhvern dásamlegan morgunmat, fara svo á Stockholms Läns Museum og sjá sýningu um kammargravar (man ekki íslenska heitið...kannski grafhýsi...já ætli það ekki bara) svo ætla ég að fika (það kalla Svíjarnir að drekka kaffi og borða sætabrauð) og svo ætla ég að fara heim og búa til Sushi með meðleigjendunum of sötra hvítvín! Kannski býð ég einhverjum fleirum. Ætla samt ekki að hafa það fleiri en 7...því að maðurinn hefur 10 fingur en missir hann þrjá, eru eftir 7, sem er magnað!
Æi ég er búin að óverdósa á Turkish pepper og er soldið rugluð í kollinum. Get borðað endalaust af þessu dásamlega salta nammi en það er verst að það ruglast svolítið líkams- og heilastarfsemin þegar maður er búinn úr pokanum.

Var með smá matarboð á sunnudaginn. Eldaði íslenskt lambalæri fyrir meðleigendurna, og 4 aðra og komst þar með að því að það er vonlaust að troða fleirum en 7 inn í þetta eldhús. En þröngt mega sáttir sitja og þetta heppnaðist bara svaka vel! Lærið var risa og ótrúlega gott en eftir 3 daga í lambakássu er ég alveg til í e-ð annað núna. Get alveg fengið leið á þessu. Yumiko bjó svo til ógeðslega góða súkkulaðimús með hallonsósu (það eru hindber uppá sænsku...hallon finnst mér bara hljóma betur)sem fullkomnaði þetta algjörlega. Ætla kannski bara að fá mér pasta í kvöld!

Já svo ákváðu jólin að koma aftur til Stokkhólms í gær. Jólasnjór í tonnavís og jinglebells í nagladekkjunum óma um borgina núna. Sænska krónan hríðfellur líka núna svo þetta er svolítið íslensk jólastemming :)

Og hverjir ætla svo að sækja um Minjavörð Suðurlands?? Er svolítið forvitin!

Vírus!

2009-03-05T18:43:00.003Z

Oh það er einhver andskotans trojuhestur búinn að ráðast inn í tölvuna mína (ef að þessi trójuhestur myndi nú bara innihalda Brad Pitt holdi klæddan með akkilesarhælinn sinn væri þetta ekki vandamál). Vírusvörnin mín var þó fljót að ná honum þar sem að skyndilega heyrðist skerandi sírenuvæl úr tölvunni og ofurkarlmannleg rödd (örugglega Brad Pitt) sem sagði "warning, a virus has been detected". Geggjað kúl. Þannig gat ég eytt sýktu skránum út á nó tæm. Gott að eiga góða vörn!

Annars er ég í eitthvað skrítnu skapi í dag. Á mjög auðvelt með að láta nákvæmlega allt fara í taugarnar á mér og í morgun virtist ég ekki hafa stjórn á neinu sem ég gerði. Missti allt út um allt og var bara svolítið spasstísk. Ástand. Vona að morgundagurinn verði skárri þar sem ég ætla að fara að græja sýni. Best að vera ekki spasstískur í hreyfingum þegar unnið er með baneitraðar sýrur. Það er frekar hættulegt.
Ég náði í sjúkrahúsið í gær og ég fæ að koma 23. mars. Það er skárra en 6. apríl! Eins gott að læknarnir segi mér að hnéð líti óaðfinnanlega út og ég þurfi aldrei aftur að ganga með hækjur. Annars veit ég ekki hvað ég gæti gert...það er ómögulegt að segja.

En já alveg rétt, í dag er líka nokkuð merkilegur dagur. Í dag eru neflilega akkúrrat 5 ár síðan að ég skellti mér á árshátíð fornleifafræðinema í Listhúsinu í Laugardal. Ég var klædd í mitt fínasta púss, var reyndar í gegnsæjum bol (tók bara ekki eftir því fyrr en ég var komin niðrí bæ og gat þá varla farið aftur uppí Kópavog og skipt) en það var allt í lagi, bara betra! Þar hitti ég svo þennan líka fína kjólfataklædda gæja sem vildi endilega herma eftir Guðna Ágústsyni og hélt að mér þætti það alveg ógeðslega fyndið, komandi frá Selfossi. Ég fann leið til að þagga niðrí honum :o) og höfum við verið frekar lukkuleg síðan. Búum reyndar í sitthvoru landinu, en ég meina...það getur nú ekki allt verið fullkomið er það?

Elsta myndin sem ég fann á tölvunni minni af afmælisbörnunum (Rétt fyrir jól 2004). Allir með voða mikið hár og svona. Til hamingju með daginn Óskar minn :o*

Vandræðalegt

2009-02-26T18:42:00.003Z

Horfði á viðtalið við Davíð Oddsson í Kastljósi í fyrra dag. Hef síðan verið að jafna mig á sálartetrinu. Mér fannst þetta svo vandræðalegt. Maðurinn tekur engum sönsum og hlustar á engar gagnrýnisraddis. Held að það sé öllum óhollt að vera svona lengi við völd. Hann er farinn að minna mig á ónefndan skólameistara við ónefndan menntaskóla útá landi sem var þar við völd í meira en 30 ár. Fólk það er fullkomlega ómögulegt að halda sönsum í svona embætti í langan tíma.
Svo fór ég að pæla í því að ég hef þrisvar á ævinni (að mig minnir) staðið augnliti til augnlits við Davíð Oddsson. Í fyrstu tvö skiptin var það í jarðaförum. Seinast var það í röðinni í öryggishliðin á Leifsstöð í september síðastliðnum, ég þá nýbúin að kveðja Óskar. Öll skiptin hef ég verið skælandi...en vandræðalegt...hvað ætli hann haldi um mig??

Annars er allt fínt í Svíjaríki. Ég staulast um á hækjunum og hef uppskorið vöðvabólgu og þreitta handleggi...þetta veeeeeenst.
Ég bakaði svo vatnsdeigsbollur og fyllti þær með lingonsultu, ósoðnum búðing sem dugði og rjóma. Toppaði þær svo með ekta góðum súkkulaðiglassúr!

Namminamminamminamm...meðleigjendunum fannst þetta betra en sænska semlan :)

Namminamminamminamm...(myndin er sviðsett)

Mánudagur til mæðu

2009-02-23T17:23:00.002Z

Ég barðist í gegnum snjóskaflana (búið að snjóa ótrúlega mikið um helgina) og fór á sjúkrahúsið í morgun í röntgen og tékk. Var svona að vonast til að læknarnir myndu segja að þetta væri svo rosalega fínt að ég þyrfti sko ekkert að vera með þessa spelku lengur en í örstutta stund í viðbót. En nei. Þetta á að vera þarna í 6 vikur hvorki meira né minna. Ég skildi lækninn þannig að þetta ættu að vera 6 vikur samanlagt svo að þá ætti ég 4 vikur eftir. En aðstoðarlæknirinn gaf mér samt tíma 6. apríl sem er eftir 6 vikur (hvað eru mörg 6 í því?). Ætla að hringja á morgun og athugha hvort þetta sé ekki e-ð mis. Ég fékk líka að skoða myndirnar sem voru teknar af mér bæði núna og fyrir 2 vikum og mér fannst þær frekar óhuggulegar. Hnéskelin lítur út fyrir að vera í 3 pörtum og ég veit ekki hvernig þetta grær rétt saman án þess að vera græjað eitthvað. En læknirinn og hnéspesjalistinn sögðu bæði að þetta liti "jätte fint" út svo ég verð bara að treysta þeim. Svo fer ég í endurhæfingu eftir að þessu er öllu lokið til að fá fullan styrk í hnéð áður en ég fer að moka í vor.
Ég fékk líka fríkort á spítalann í dag. Nú er ég búin að borga svo mikið í sænska heilsukerfið að ég fæ frítt í heilt ár!! Rosa gaman...ætla ógeðslega oft til læknis héðan í frá :)

Svo ætlaði ég að baka bollur í dag. En uppskriftin var föst á Internetinu sem virkaði ekki hjá mér í dag núna nenni ég ómögulega að fara að baka! Ég fór samt í búð í dag og keypti allt sem mig vantaði í bollurnar (nema búðing...finn hvergi búðing hérna svo það verður bara sulta og rjómi í þetta sinn) svo ég tek bara 2. í bolludegi á morgun.
Ég fór samt á kaffihús áðan og fékk mér sænska semlu. Hún var sett á djúpan disk og svo fékk ég heita mjólk til að hella yfir. Þetta er rosa sænskt og bragðaðist ógeðslega vel!

Tók þessa mynd í gær:

Vona að enginn hafi ætlað út að hjóla í morgun :o/

Sunnudagur til leti!

2009-02-22T13:01:00.002Z

Ég ligg í rúminu í allsherjar leti og pæli í því sem ég þarf að gera. Mig langar helst ekki að gera neitt. Gæti alveg hugsað mér að liggja hér í allan dag, en ég þarf víst að þvo þvott og borða eitthvað. Þyrfti líka að fara í búð og kaupa mér eitthvað að borða, en það er búið að snjóa alveg í kaf hérna og ég á ekkert voðalega auðvelt með að ferðast um í hálkunni. Fer á morgun.
Fer líka til læknis á morgun. Á að fara í röntgen og skoðun og þá kemur í ljós hvað ég þarf að vera með þessa spelku lengi í viðbót og hvort það sé ekki bara í fínu lagi með mig. Rosa spennó!
Á morgun er líka bolludagur á Íslandi. Mig langar svolítið að baka nokkrar vatnsdeigsbollur, en við sjáum til. Er að fara á STARK fund á einhverju kaffihúsi þar sem ég ætla að borða semlu (það er sænska bollan). Þær eru gerðar úr einhverskonar deigi með fullt af kardimommum í og fylltar með marsípani og rjóma. Svo er flórsykri stráð yfir þær. Rosalega gott! Þessar semlur eiga samkvæmt ströngustu reglum að borðast á þriðjudeginum eftir okkar bolludag en í raun byrjar fólk að borða semlur fljótlega eftir jól og hættir því svo næsta þriðjudag. Þá er svokallaður Fettisdag og þá étur fólk voða mikið til að undirbúa sig fyrir lönguföstu. Svo er Askondag eftir það, en ég veit ekki enn hvað fólk gerir af sér þá. Kemst að því á morgun.
Ég er farin að skoða herbergi/íbúðir hérna. Mig langar svolítið að vera komin með íbúð áður en ég fer heim í vor svo ég geti geymt eitthvað af draslinu mínu hérna. Get ómögulega hugsað mér að flytja allt heim aftur og svo aftur út í haust. Húsnæðismál í Stokkhólmi eru reyndar ekki uppá marga fiska en við sjáum hvað setur. Ég hef nú alveg 3 mánuði til stefnu...ætti eiginlega fyrst að hafa áhyggjur af flugfarinu heim!

Er að velta einu fyrir mér...

2009-02-15T21:00:00.002Z

Núna verður kosið til alþingis í vor (finnst einhvernvegin eins og það sé svo stutt síðan síðast...) og ég á víst að geta kosið utan kjörfundar (eða hvað sem það nú heitir). En ég skil samt ekki eitt og ætlaði að athuga hvort einhver af þeim sem þetta les gæti útskýrt fyrir mér. Ef ég tæki nú þá ákvörðun að fara í sendiráðið og kjósa, hvaða kjördæmi væri ég þá að kjósa í? Mér er neflilega ekki alveg sama um það. Veit einhver?

Skammist ykkar!!!

2009-02-14T21:52:00.003Z

Hvað eruði eiginlega að hugsa?? Við Gugga ákváðum að hafa júróvisjón kvöld og sækja okkur pizzu og glápa á Melodie festivalen hérna í Sverige. Þetta er alveg mega flókið dæmi sem ég nenni ekki alveg að útskýra. Kynnirinn var alveg fráb. Hún auglýsti það t.d. einu sinni að hún væri nú single og það væri nú alveg fráleitt og hvatti alla single karlmenn á Gautaborgarsvæðinu að hafa samband. Svo fór hún að hlæja voða mikið og sagði u.þ.b. "nei hvað er ég að segja, allir karlmennirnir sem horfa á þetta eru náttúrlega samkynhneigðir"!!! Við veltumst um af hlátri!
En allavega...við skemmtum okkur vel yfir sænska júró, en svo þegar það var búið ákváðum við að horfa á restina af íslenska júró á ruv.is. Komumst svo fljótlega að því að þetta var lokaþátturinn. Er búin að fylgjast aðeins með þessu og vissi hvaða lög voru að keppa og mér fannst bara eitt lag koma til greina fyrir mína parta. Það voru jú sæmileg lög inná milli eins og lagið með Ingó, en bara eitt lag sem mér fannst virkilega fínt. Stelpan var í ótrúlega sætum kjól og þetta var allt eins og klippt út úr Þrek og Tár. MÉR fannst það æði en það var greinlega enginn sammála mér því að fertuga fótboltamamman úr Grafarvoginum hún Jóhanna Guðrún hirti vinninginn! Skil þetta ekki....bara skil þetta engan veginn. Ætla formlega ekki að halda með Íslandi í ár!
Ætla að setja inn vídjóið þar sem eftirlætið mitt var flutt í fyrsta skiptið:

Fatlafólið heldur sig heima...

2009-02-11T15:49:00.003Z

Hef enn ekki farið á stjá. Ætlaði niðrá deild í dag og græja sýni, en það var víst svo hált að ég ákvað að halda mig heima við enn einn daginn. Fer út á morgun...(á morgun segir sá...
Tók myndir í morgun af meiðslunum. Mér finnst það svolítið skuggalegt hvað hnéð er bólgið ennþá. Samt er bólgan búin að hjaðna mikið!

Fína spelkan mín:

Bólgan er soldið svakaleg:

Fatlafól næstu 5 vikurnar :o/

2009-02-09T16:24:00.003Z

Í gær fór ég á skauta í Kungsträgården! Elska að fara á skauta...finnst það alveg ferlega skemmtilegt! Vorum 5 íslenskar meyjar í góðu veðri og allt bara rosa gaman! Fékk í þetta skiptið skauta með almennilegum tönnum svo ég komst alveg á ágætis hraða og gat farið í hringi og allt...ýkt stuð. Þegar við vorum búnar að vera á svellinu í rúman klukkutíma og ætluðum svona að fara að hugsa okkur til hreyfings náði ég að bora tönnunum í ísinn og detta á skeljarnar. Þetta var ekkert ægilegt fall en ég meiddi mig aðeins í hnjánum. Stóð svo bara upp og reyndi að skauta eitthvað meira. Það var ekki alveg að ganga svo við fórum bara og náðum í dótið okkar og skiluðum skautunum. Var frekar hölt og fann að hnéð á mér var farið að bólgna upp, en við röltum bara á kaffihús, og sátum þar í góða stund. Svo þegar ég ætlaði að standa upp var ég orðin mun verri í hnénu. Var svakalega bólgin og gat eiginlega ekki hreyft það neitt. Þær Kristín og Vala sem voru með okkur á skautum eiga heima rétt hjá Söder sjukhuset þar sem er bráðamóttaka og ég ákvað að elta þær heim og fara á slysó til að láta búa um þetta og fá eitthvað bógueyðandi. Gugga ákvað að koma með mér því þarna voru þær byrjaðar að bera mig um í kóngastól! Svo komum við á slysó og ég var skráð inn kl 17:20. Svo var ég kölluð inn og einhver hjúkka tók á móti mér og skoðaði á mér hnéð, setti mig svo í rúm og mér var trillað inn á gang. Sem betur fer var Gugga með mér því það skipti enginn sér af mér fyrr en kl 22:15. Þá kom önnur hjúkka og trillaði mér inn á einhverja stofu. 45 mínútum síðar kom læknirinn! Hélt að ég myndi eiga afmæli þarna! Læknirinn var hissa að sjá að ég væri ekki búin að fara í röntgen og hvað ég væri búin að bíða lengi (!!!) og vildi senda mig í myndatöku med det samme, en fyrst þurfti að stinga í bólguna og taka blóð til að létta á þrýstingnum. Gugga var þarna til að halda í höndina á mér, en ef það er eitthvað sem ég meika ekki þá eru það nálar og sprautur...fer í algjört kerfi, svo það var gott að vera ekki ein! Svo fór ég í röntgen. Það voru teknar nokkrar myndir og einhverntíma eftir miðnætti fékk ég að vita að það væri sprunga í hnéskelinni minni og ég þyrfti að fá gifs! Kl 2:30 komum við Gugga heim með taxanum sem spítalinn splæsti í, ég í gifsi frá mjöðm og niður á ökkla. Það var þó bara bráðabirgða og í dag fór ég (með taxa í boði spítalans)og lét taka gifsið og fékk í staðin ægilega fína spelku sem ég að vera með næstu 5 vikurnar. Fer samt eftir 2 vikur í röntgen og tékk. Gugga var hjá mér í nótt og kom með mér til læknisins í dag og er búin að vera alveg frábær hjálp!

Rosa fjör! Þannig að það sem ég hélt að þyrft bara aðeins að vefja og gefa mér bólgueyðandi varð aðeins meira :o/
Og hvað lærum við af þessu??
Nota hnjáhlífar næst þegar ég fer á skauta!!

Loksins...

2009-02-04T21:47:00.002Z

...sér maður að það er eitthvað að gerast í lánasjóðsmálum!! Katrín Jakobs er orðin uppáhalds stjórnmálamaðurinn minn!
Var að útskýra LÍN fyrir fólkinu í sumarbústaðnum og þau áttu ekki til orð. Þeim fannst þetta fáránlegt. Var voða fegin að vita það að íslenskir námsmenn eru ekki bara óþolinmóðar og hysterískar týpur!

En það eru fleiri óánægðir með skólamál en íslenskir námsmenn. Hún Debbie er víst voða fræg útá Írlandi fyrir símaötin sín og í þessu vill hún láta rústa skólanum sínum:

Myndir...hrúga af þeim!

2009-02-03T22:44:00.002Z

Það er orðið langt síðan ég bætti einhverju við á picasa síðuna mína. Núna eru þar hins vegar þrjú ný albúm sem heita þeim frumlegu nöfnum Nóvember '08, Desember '08 og Janúar '09. Skoðið og njótið.

Hvenær ætli ég hafi bloggað síðast? Allavega fyrir ríkisstjórnarskipti. Óska Íslendinum nær og fjær innilega til hamingju með nýja ríkisstjórn. Vona nú að það fari eitthvað að lagast. Ekki getur þetta orðið mikið verra...kannski samt öðruvísi vont.

Við fórum nokkur í bústað um síðustu helgi. Áttum ógurlega kósý helgi með göngutúrum og nammiáti, arineld og sykurpúðum...og dassi af áfengum veigum og Youtube. Vorum í húsi sem foreldrar Elinar, vinkonu minnar úr skólanum eiga rétt hjá Linköping. Ég er búin að setja inn myndir úr ferðinni.

Er byrjuð að vinna aftur á Labbinu. Er núna að leysa upp sýnin mín í allskonar baneitruðum upplausnum, vandlega blönduðum með pípettum og svona vísindalegu stöffi. Er í slopp og með hanska og öryggisgleraugu og allt! Geðveikt töff!

Annars er voða lítið að frétta...ætla þó að enda þetta með því að gleðja ykkur með videobroti af einhyrningnum Charlie og vinum hans...þeir eiga hjarta mitt þessa dagana:

Er allt að verða vitlaust??

2009-01-22T20:55:00.002Z

Táragasi beitt, gangstéttarhellur fljúga, 370 manns handteknir af herra Stoned (innsláttarvilla sem virkar bara fínt), ríkisstjórnin hangir á bláþræði, fleiri þúsund manns mæta í mótmæli, umkringja Geir, láta öllum illum látum...rosalegt...
...vonum bara að þetta hafi áhrif!

Finnst sumir vera að ganga of langt í þessu en þá er bara um að gera að fleiri sem ganga ekki og langt mæti á svæðið og láti í sér heyra. Ekki láta einhverja hellukastandi óvita eyðileggja gott starf!

Nú er búið að stofna einhver samtök appelsínugulur.is. Ég er rosalega sammála öllu sem þarna kemur fram og myndi kannski alveg skrá mig í þessa facebook grúppu. En einu sinni bjó ég í Belfast. Þar er einmitt svona appelsínugul fylking. Hún stendur reyndar fyrir eitthvað allt annað en friðsamlegheit og samstöðu, svo ég held að ég passi á allar svona appelsínugular tengingar.

Allt er fínt í Svíjaveldi...fer að verða ansi brjálað að gera í skólanum! Fór á skauta um síðustu helgi. Í fyrsta skipti síðan í dimmissjón fyrir örfáum árum síðan. Þetta var rosalega gaman! Fer pottþétt aftur fljótlega! Ég var aðeins stirð til að byrja með en svo liðkaðist maður aðeins. Samt ekkert á við það sem maður gat þegar maður gat bara rölt útí móa og fundið fínt svell og skautað og skautað og skautað. Hverjum datt í hug að byggja Grundarhverfið?? Sá/sú er með rosalegan glæp gagnvart æsku Selfyssinga á samviskunni. Ljóta Grundarhverfi...

En já eins og ég sagði, allt fínt í Svíjaveldi...bæjó.

Matseðill kvöldsins

2009-01-16T21:24:00.003Z

2. pósturinn í dag...kannski hef ég bara ekkert betra að gera...en Nok ákvað að elda fyrir okkur Yumiko í kvöld og ég bara varð að segja frá!
Hún hefur talað mikið um það hvað hún kunni ekkert að elda, en sé að reyna að læra og hefur lengi ætlað að elda eitthvað tælenskt handa okkur. Hún leifði okkur að hjálpa smá, enda alltaf skemmtilegra að hafa einhvern með sér í eldhúsinu, og þvílíka veislan! Ligg hérna afvelta af ofáti.
Á matseðlinum var:
Yum Tuna Foo (held það sé skrifað svona. Steiktur túnfiskur úr dós og fersk epli með einhverri himneskri dressingu)
Satay svínakjöt með gúrkusalati
Tom Ka Gai kókossúpa með kjúklingi og allskonar (kann núna að búa svoleiðis til from scratch)
Panaeng karrí með nautakjöti
Ég skrapp svo í System Bolaget í dag og keypti Singha bjór til að skola þessu niður.
Svo var hún með tvennskonar sætindi í eftirrétt, svo var bæði svolítið skrítið...gert úr baunum, kókos, sykri og sesamfræjum, en samt voða gott OG Yumiko gerði Jasmine jello með ávöxtum!

Ég er með íslenskt lambalæri í frystinum sem ég ætla að elda fyrir þær einhvern daginn. Finnst bara íslensk matargerð visna svolítið í samanburði við svona asísk fínlegheit. Þar er allt svo ferskt og dásamlegt og fínt. Verð að impróvæsa eitthvað.

Sjitt hvað ég er södd!

Riflildi

2009-01-16T12:39:00.002Z

Mig dreymir voðalega mikið þessa dagana. Sérstaklega þegar ég á að vera að koma mér framúr en ákveð að snúsa aðeins lengur. Þá gerast of ótrúlegustu hlutir. Mig hefur dreymt það nokkuð reglulega að ég rífist heiftarlega við vinnufélagana um allskonar hluti sem ég man nú yfirleitt ekki. Ég reyni að rökræða en verð oftar en ekki uppiskroppa með rök og verð þá sár og svekkt...tek þetta voða nærri mér. Stundum verð ég bara ógeðslega pirruð á því að enginn sé sammála mér. Þetta orsakar það oft að ég vakna ægilega pirruð, sár eða reið og held þannig útí daginn.
Í morgun var ég komin í uppgröft í frönskum skógi með Söndru og Dagný. Þetta var voðalega fallegur staður, en einhverra hluta vegna urðum við ósammála um eitthvað sem ég man ekki alveg og fórum að rífast. Bráðlega var ég orðin rauð og fjólublá af bræði útaf því að Sandra og Dagný stóðu þétt saman gegn mér og vildu ekki samþykkja það sem ég sagði. Varð svo eins og oft áður uppiskroppa með rök og varð sár. Fór og klagaði í Bjarna, sem sendi mig á Stokkseyri að grafa þar. Átti að grafa á ströndinni...í sandinum, en þar var alveg ægilegt brim og svakalegt haglél. Var orðin hrikalega frústreruð þegar ég var alltí einu komin í bæinn og var á trúnó með Söndru. Hún skildi mig alveg. Hún vildi bara ekki segja Dagný það...hún myndi ekki skilja. Ákvað að sættast við Söndru, en ekki Dagný. Kannski ég sættist við hana bara í næsta draumi.

Svona eru morgnarnir í Stokkhólmi nú spennandi!

Afmælisdrengurinn :)

2009-01-12T20:20:00.005Z

Þessi myndarpiltur á afmæli í dag!! Hann er orðinn eitthvað í kringum 25 ára og kann því víst bara vel. Ég get því miður ekki verið hjá honum í dag, er neflilega í öðru landi, en er búin að tala við hann á skype. Endilega skilið hamingjuóskum til hans hérna...eða hringið í hann...hann er neflilega ekki með feisbúkk :o/

Þú er minn sælgætisgrís, þú ert minn súkkulaðís, þú ert sætabrauðsdrengurinn miiiiiiinn ;o)

Til hamingju með afmælið :o*

Komin aftur til Stokkhólms

2009-01-09T19:32:00.002Z

og var ekkert sérstaklega sátt við það...reyndar bara mjög ósátt. Langaði bara aftur heim, eða þá að flytja alla með mér út!
Ískápurinn minn var galtómur og eitthvað lítið í hillunni minni. Var ekki í neinu stuði í gær til að versla í matinn, svo ég fór á næstu pizzabúllu og fékk mér pizzu. Hélt að ég væri að fá mér pizzu með sardínum, salami, ólífum og hvítlauk en komst svo að því þegar ég beit i pizzuna að sardeller uppá sænsku eru ekki sardínur eins og ætla mætti heldur ansjósur. Ég er engin rosaleg ansjósukona...það má allavega ekki vera mikið af þeim...svo ég pillaði mest allt af. Pizzan var nú samt alveg ágæt.
Svo fór ég í Lidl núna áðan og keypti fullt af mat og borgaði lítið fyrir hann. Varð þá aðeins kátari yfir því að vera komin í annað land.
Borðaði svo ódýran fisk í kvöldmatinn með fullt af ódýru grænmeti og ódýrum hrísgrjónum og drakk svo kaffi í eftirlitsmat, bruggað úr ekki svo ódýru fínu nýju kaffivélinni hennar Nok....rosalega gott.
Langar ykkur ekki bara að flytja út til mín?? Þið eruð svo velkomin :)

Takk fyrir jólin!

2009-01-08T04:46:00.001Z

Jæja...ætla að drífa mig í skólann. Takk fyrir góð jól og sjáumst í vor. Bæjó.

(blogga nú alveg eitthvað fyrir vorið)

Á maður að segja e-ð um þetta ár?

2009-01-02T19:15:00.002Z

Good riddance bara! Gleðilegt nýtt ár...alltaf gott að fá e-ð nýtt. Hvenær ætli maður verði svo farinn að venja sig á að skrifa '09 í staðinn fyrir '08. Það er alltaf svona það erfiðasta að yfirstíga á nýju ári.
Annars var þetta nú ágætt ár svona framanaf. Óskar útskrifaðist og ég sótti um nám í Svíþjóð. Vann á leikskóla fyrstu mánuðina en fór svo í uppgröft síðustu mánuðina áður en ég yfirgaf landið í von um frama í Stokkhólmi. Skildi Óskar eftir og fannst það ekki jafn gaman, en bróðir hans sér um að halda honum félagsskap á Holtsgötunni í staðinn fyrir mig. Hóf námið...fannst það ansi strembið en þetta kemur allt. Fékk svo æsispennandi lokaverkefni og þetta lítur allt frekar vel út. Fjármálin hrundu svo heima á Íslandi og ég fór næstum því yfirum af stressi...reddaðist samt fyrir horn. Maður fær eitthvað að finna fyrir þessu á nýja árinu. Fékk Óskar í heimsókn í Nóvember. Við gerðum fullt af ókeypis hlutum, þar sem gengið var kannski ekki það hagstæðasta og svo fór ég til Köben í nokkra daga til P&D og leyfði þeim að halda mér uppi :) Svo loksins eftir mikla óþreyju fór ég heim í jólafríið. Núna styttist bara og styttist í að ég fari aftur út og ég er komin með pínu hnút í magann yfir verkefninu sem bíður mín...1. hluti ritgerðarinnar.
Ég strengdi engin áramótaheit. Maður lofar alltaf að vera duglegri að læra, sinna hinu og þessu, megra sig og hætta að reykja, en svíkur það alltaf svo ég ætla að reyna að að sleppa því að strengja einhver heit...nema kannski að læra að skrifa '09 í staðin fyrir '08. Það væri ágætt að mastera það.

Var í bænum á gamlárs og fílaði skaupið alveg í botn. Fannst þetta bara eitt það besta sem hefur komið lengi...og er ekki að reyna að vera kurteis. Það hefði nú verið eitthvað skrítið ef það hefði verið vont með allt þetta ár til að gera grín að. Veit að það er til alveg rosalegt magn af aukaefni sem þurfti að klippa burt...það væri ekki verra að fá skaup 2.
Fór svo á Selfoss í gær hálf vönkuð eftir gleðina á nýjársnótt og er eiginlega ennþá að jafna mig...frekar tóm í kollinum mínum.

En allavega...heppí njú jír!

Róóóóólegt veður!

2008-12-24T09:48:00.002Z

Ljósastaurinn sveiflast til og frá fyrir utan hjá mér og glymur í öllu húsinu...oft verið fallegri aðfangadagur!

Eins bara fokking gott að við komumst yfir heiðina!

Annars vil ég bara óska öllum mínum gleði og friðar yfir hátíðirnar. Takk fyrir gömlu árin og höfum það nú ótrúlega kósý á því nýja!

Jólakveðja,
Inga Hlín

Minna en sólarhringur...

2008-12-17T16:51:00.002Z

...þangað til ég stíg fæti á íslenska jörð! Eins gott að hún verði á kafi í snjó og jólalegheitum því hér er ekkert slíkt að finna.
Það má samt ekki vera nein hríð því ekki vil ég að flugvélinni seinki.
Kortið mitt fína fékk aldeilis að finna fyrir því í dag þegar ég græjaði síðustu jólagjafirnar, nú verð ég bara að reyna að koma þeim fyrir í ferðatöskunni...úps!

Allavega, í gærkvöldi var julsittning hjá STARK og var ég af einskærri góðmennsku Guggu boðin fram í nefndina. Þetta var eitt mesta fíaskó sem ég hef tekið þátt í en ég held að þeir sem voru að éta og njóta hafi skemmt sér bara príðilega. Ég var föst í eldhúsinu mest allan tímann og heyrði því bara óminn af söngnum. Er búin að ímynda mér sænskt aðfangadagskvöld þannig að allir sitja við borðið í grímubúning (því Svíar skemmta sér ekki nema í búning), syngjandi jólalög í bland við drykkjuvísur (því ef maður á að skemmta sér í Svíðjóð þá verður að vera fjöldasöngur) og staupa sig svo af ýmsum snöpsum á milli rétta (verður að vera minnst 25 tegundir af snöpsum svo þetta blandist nú allt vel í maganum).
Já þeir eru skondnir þessir Svíar.

En ég ætti að fara að pakka og gera eitthvað...hejdå!

Rosa action!!

2008-12-10T22:37:00.003Z

U.þ.b. viku eftir að leigusalinn fór til útlanda, sendi hún okkur email þar sem hún bað okkur um að opna ekki fyrir neinum sem við þekktum ekki og ekki tala við neinn ókunnugan. Við mættum heldur ekki segja neinum frá því hvar hún væri og hvað hún væri að gera. Okkur hefur alltaf fundist þetta svolítið grunsamlegt og ekki vitað alveg hvað við ættum að halda um þetta. En við höfum fylgt leiðbeiningum hennar í hvívetna og ekki opnað fyrir neinum sem við þekkjum ekki og verið voða þægar og góðar.
Í kvöld birtist svo maður í bakgarðinum okkar og byrjaði að henda dóti í gluggann hjá Pimchanok og veifa eins og brjálæðingur hún varð frekar hrædd og lét okkur vita. Við fylgdumst með honum labba fram og til baka í garðinum takandi upp alls konar drasl til að henda í gluggann okkar, svo fór hann fyrir framan húsið og reyndi að opna hurðina inn í húsið, fór svo eitthvað annað og kom svo til baka og allt endurtók sig. Við vorum orðnar ansi skelkaðar og að sjálfsögðu búnar að hæpa hvor aðra upp og ákváðum að hringja á lögguna! Ég hringdi og talaði við einhverja konu sem sagðist ætla að senda menn til okkar. Á meðan við biðum eftir löggunum, komst maðurinn inn í húsið. Stelpurnar sáu það og urðu mjög hræddar. Svo taldi Yumiko sig hafa séð manninn fara inn í íbúðina við hliðina á okkar. Löggumennirnir birtust svo á tröppunum hjá okkur og við sögðum þeim hvað væri í gangi og hvert við héldum að maðurinn hefði farið. Svo fórum við inn í íbúð.
5 mínútum síðar hringdi löggan í mig og sagðist hafa talað við manninn. Þá var þetta nágranni okkar sem hafði læst sig úti og var að reyna að ná athygli okkar með því að henda dóti í gluggann okkar klukkan hálf ellefu um kvöld! Ég afsakaði mig svakalega og sagðist bara aldrei hafa séð þennan nágranna minn :o/ Rosa neyðarlegt haha!
Býst fastlega við því að verða valin nágranni ársins í Svíþjóð árið 2008 hahahah!!

Æææ...segið mér að þetta sé voða fyndið en ekki rosalega hysterískt af mér...plís?
Ég lét lögguna allavega vinna sér inn fyrir kleinuhringjunum...og það er nú mikilvægt!

Hvernig fer maður að þessu?

2008-12-08T20:14:00.014Z

Það er tælensk stelpa nýflutt inn til okkar á Bjölluveginn. Jana þýska er farin heim til sín fyrir nokkru og núna erum við þrjár aftur, íslensk, japönsk og tælensk...fyndin blanda. Allavega. Hún virkar mjög hress og skemmtileg, en er að upplifa smá menningarsjokk hérna. Hún talar mjög góða ensku, en hefur aldrei komið út fyrir Tæland og talar náttúrlega enga sænsku. Það er því smá vandamál fyrir hana að fara bara útí búð og gera einföldustu hluti. Allt er útskýrt á sænsku og allt eru þeta hlutir sem hún hefur aldrei séð. Þar að auki hefur hún aldrei upplifað lægra hitastig en 15°C. Hú hefur því aldrei þurft að kaupa sér úlpu, hlýja skó eða nokkuð annað sem okkur finnst fullkomlega eðlilegt að eiga bara inní skáp. Hún var að spyrja mig áðan um ýmislegt sem hún þarf að kaupa og hvar hún ætti að fara og hvað hún ætti að biðja um. Ég gat vonandi hjálpað henni eitthvað, en mér fannst voðalega erfitt að hugsa um þetta svona. Yfirleitt fer maður bara og kaupir eitthvað sem manni finst fínt. En hvað ef maður hefur aldrei séð svona flíkur, veit maður þá hvað er fínt og hvað er praktískt? Hvernig fer maður að þessu eiginlega?

Annars fór ég á hundasýningu um helgina! Sá alveg svakalegt magn af hundum, sumum fínum, öðrum ekki svo fínum og fullt af skrítnum! Svo margar tegundir til maður.
Íslensku hundarnir voru nú ekki margir og gerðu ekki stóra hluti, en það voru þarna systkin sem voru besta tík og besti hundur sem voru voðalega fín.

Svo rölti ég um tegundabásana og sá þá þessa gólfmoppuhunda...mjög hentugt fyrir þreyttar húsmæður fyrir jólin!

Svo lá þessi Leonberger í makindum sínum í miðjum ganginum og hafði það bara gott.

Það var mikið af stórum tegundum þarna og mér finnst Nýfundnalandshundurinn alltaf svo mikill bangsi. Hefði kannski þurft að þvo þessum aðeins í framan.

Og talandi um bangsa...Chow Chow!!! Langar ykkur ekki í knús??

Ég forvitnaðist aðeins um þessa tegund, Nova Scotia duck tolling retriever. Voða góðir veiðihundar víst og frábærir heimilishundar, en þurfa strangt uppeldi og mikinn aga...hmmmm...óttaleg krútt samt

Svo sá ég heimsins mesta krútt þarna. Mig langar svo í whippet eftir þessa sýningu að ég veit ekki hvað! Svo mjúkir og hlýjir og sjáið bara þessi augu!

Mig hefur aldrei langað mikið í Rhodresian Ridgeback, en þeir eru rosalega flottir. Þessi hafði það náðugt hjá eigandanum og kúrði bara meðan fólk tók myndir. Ætlaði sko ekki að vera á gólfinu hjá hinum vitleysingunum!

Svo var komið að úrslitum og þetta eru topp 5. Annar frá vinstri (bearded collie) vann og varð sá fyrsti í öðru sæti (american akita).

Svo var líka keppt í freestyle þarna. Þá eru það krakkar sem eru búnir að æfa dansrútínu með hundinum sínum og það er ótrúlegt hvað er hægt að kenna hundunum og hvað þeir hafa gaman af þessu! Alveg ótrúlegt!

En hey...verð að hætta þessu bulli og gera eitthvað annað...kem heim eftir 9 daga ;o)

ekki tvær vikur!

2008-12-05T20:22:00.002Z

Sjáið bara hvað það er stutt þangað til ég kem heim í jólafrí :) Það gerir mig smá stressaða, því ég þarf að vera komin vel af stað með skrifin fyrir jól. Get nú gert e-ð heima, en það er eitthvað sem segir mér að ég muni ekki koma til með að hafa mikla einbeitningu í bækurnar um jólin :o/ Bannað að gefa mér skáldsögur í jólagjöf...ullarsokkar væru vel þegnir!

Á morgun ætla ég að fara á RISA hundasýningu hjá sænska kennelklúbbnum sem verður tileinkuð íslenska fjárhundinum.
Sjúklega margar tegundir á sjuklega stóru svæði, en aðal planið er að sjá íslenska fjárhundinn rúlla þessu upp ;o)

Munnurinn minn logar...

2008-11-30T19:45:00.002Z

Tvö blogg á einum degi? Saga til næsta bæjar?

Er ekki alveg að venjast útlenskum chili. Heima kaupir maður chili og notar einn og jafnvel tvo í eladamennskuna. Ég keypti mér chili um daginn og stakk í frystinn af gömlum vana. Í fyrsta skiptið sem ég notaði þetta hérna, saxaði ég einn heilann útí chili con carne. Þetta varð heitasta chili con carne sem ég hef bragðað. Nánast óætt. Næst ætlaði ég að búa til núðlurétt. Ég mundi eftir síðasta skipti, en ákvað að það hefði verið einstakt tilvik og chiliinn hérna gæti bara ekki verið svona sterkur. Valdi minnsta aldinið í pokanum og saxaði það heilt útí. Þetta varð sterkasti núðluréttur sem ég hef bragðað og enginn séns að finna neitt bragð af hinum ágætu kryddunum sem ég setti útí. Í kvöld ákvað ég að búa mér til grænmetissúpu með beikon bitum. Ákvað að reka út kvefið og setja slatta af hvítlauk útí og what the hell...skelli bara chili útí líka. Í þetta skiptið ákvað ég þó að taka hálfann chili en valdi stærsta aldinið (á ekki hvort eð er það stærsta alltaf að vera mildast?). Súpan var voða góð á bragðið...en flaming sterk. Setti vatn og meira vatn og smá mjólk til að redda þessu, en súpan er samt sem áður frekar sterk. Held að kvefið eigi eftir að rjúka úr mér núna!

Svo var ég að fá svo skemmtilegt með póstinum núna. Það er jóladagatal Vi búðanna hérna. Það virkar þannig að á hverjum degi fram að jólum verður einhver ein vara á fáránlegu tilboði. Á morgun verður hægt að kaupa sér Julmustdós á 1 sek.
2. des verður hægt að kaupa sér örbylgjupopp-pakka á 2 sek.
3. des verður hægt að kaupa kartöflur á 3 sek/kg
Og svo heldur þetta áfram fram að jólum. Spennandi ekki satt?

1. í aðventu

2008-11-30T16:42:00.002Z

Þegar maður lætur ekki vita af sér í langan tíma, er erfitt að ákveða hvað maður eigi að skrifa um.

Ég fór til Köben. Það var ógurlega gaman. Fór á Þjóðminjasafnið þar og ráfaði um miðbæinn. Svo sá ég tónleika með Mark Lanegan og Isobell Campbell. Þau voru æðisleg! Er alveg uppveðruð yfir þessum tónleikum. Hann er með svo ótrúlega rödd sem maður nær bara ekki að skilja. Rödd sem vonlaust er að reyna að ná fram í stúdíói. Þetta er e-ð sem maður verður að sjá live.
Ég náði mér þó í eitthvað fjandans kvef í Köben og er búin að vera að jafna mig á því. Hata kvef. Afhverju er ekki búið að finna lyf við kvefi? Alltaf verið að gera allskonar rannsóknir á krabbameini og hjartasjúkdómum og taugasjúkdómum, en enginn pælir í kvefi! Hvað ætli það séu margir frá vinnu á hverjum degi í heiminum útaf einhverri kvefpest? Lyf við kvefi myndi örugglega gera góða hluti fyrir hagkerfið (ekki fara að taka mig alvarlega...er bara að bulla).

Jólin eru komin til Stokkhólms. Allur miðbærinn er að kafna í mörkuðum og jólaperum og þá kemst maður í fíling. Það er 1. í aðventu í dag og ég er ekki með nein plön um að skreyta hjá mér eða baka eða nokkuð. Ætla kannski að baka smá, en ætla annars að neita mér um jólastemmingu þangað til ég lendi 18. des...nema náttúrlega þegar ég er niðrí bæ...þá er ekki hægt að neita sér um stemminguna. Hún er bara þarna.
Er reyndar lítið búin að fara og skoða. Fer bráðum í jólaleiðangur. Maður verður víst að fara að huga að pökkunum sem fara undir trén...get ekki beðið eftir að hugga mig við jólatréð heima á Selfossi. Verð að reyna að bægja þessum hugsunum frá, á að hugsa um skólann!

Í næstu viku fer ég að undirbúa lokaverkefnið mitt. Á að byrja á að fræðast um aðferðirnar og undirbúa sýnin. Rosalega verður gaman að fá að klæða mig í hvítann slopp og setja á mig hvíta hanska. Það verður kannski svolítið erfitt fyrir mig að halda þessu dóti hvítu, en ég á örugglega eftir að vera ógeðslega töff í þessum galla.

Lady and gentleman!

2008-11-16T18:38:00.002Z

Óskar kom og heimsótti mig á miðvikudaginn. Fór aftur í morgun, eftir rosalega góða ferð. Skoðuðum 3 söfn saman og svo skoðaði Óskar eitt annað safn á meðan ég var í skólanum...geri aðrir betur!
Strax á miðvikudagskvöldið fórum við á Vasa safnið. Skoðuðum skipið fræga vel og vandlega og vorum síðust út. Á endanum heyrðum við "Lady and gentleman, now the museum is closing, thank you for your visit og bla bla bla"...þau vildu líklega fara að loka!
Daginn eftir var bæjarrölt. Fórum á Stockholm stadtsmuseum og skoðuðum sögu Stokkhólms áður en við fengum okkur rölt um bæinn og svo inn á Östermalms Saluhall (risa innandyra markaður). Eftir það fórum við á Historiska museet og náðum að skoða helminginn af því áður en við vorum aftur orðin síðust út og þurftum að yfirgefa svæðið...skoðum bara restina næst þegar Óskar kemur.
Á föstudaginn fór ég svo í tíma og Óskar fór á safn á meðan. Ég sýndi honum svo háskólasvæðið og seinna fórum við niður í bæ að skoða í búðir (m.a. fornbókabúðir...erum lúðar, ég veit)...meira svona til að kíkja á verð samt. Hittum svo Guggu og Söndru, sem var líka í heimsókn í Stokkhólmi og Elínu sænsku í drykk um kvöldið.
Í gær ákváðum við að þræða Gamla Stan. Við fórum nánast inn hverja einustu götu og fórum inní óteljandi antík búðir. M.a. eina sem seldi bara dót úr skipum. Ótrúlega mikið úrval af antík munum í Stokkhómi! Fórum svo í gærkveldi á Eþíópískan veitingastað. Það var rosalega gott! Ef einhver ætlar að koma að heimsækja mig, verður sá hinn sami að sætta sig við að fara á þennan veitingastað! Rosalega góður matur sem maður át náttúrlega með höndunum! Toppen!
Við átum náttúrlega á okkur gat meðan hann var hérna...enda bæði mikið fyrir mat almennt. Ég eldaði mjög svo instant sænskar kjötbollur eitt kvöldið. Við fengum okkur líbanskan mat í saluhallen. Einu sinni fengum við okkur pizzu og Óskar varð náttúrlega að fá sér mest spes pizzuna á matseðlinum sem hét einmitt því skemmtilega nafni "Oscars special". Hún var með svínafille, krabbakjöti, kavíar og bearnessósu. Smakkaðist ágætlega en mjög spes! Svo gerðist ég svo djörf að elda Elg hérna á föstudagskvöldið. Gerði allt eins og mig minnti að mamma gerði þegar hún býr til svona villibráðarsteikur og þetta heppnaðist bara rosalega vel! Var rosalega montin!
Þetta voru alveg dásamlegir dagar...verst bara að þeir liðu eins og tvær sekúndur. Hlakka núna rosalega til að koma heim um jólin og vera lengi. Ætla að njóta þess í botn!
Set inn einhverjar myndir þegar Óskar er búinn að senda mér þær.

Jííííhaaa!

2008-11-10T19:24:00.002Z

Óskar kemur í heimsókn ekki á morgun heldur hinn og svo eru Pétur og Dögg búin að redda miðanum til Köben þessar elskur! Verð sumsé í köben frá 22.-26. sept. Ætla að hafa það rosalega gott!
Næstu daga ætla ég að njóta þess að hafa Óskar hjá mér, sýna honum borgina og fá að túristast aðeins sjálf í leiðinni. Ætlum að fara á söfn og veitingastaði og svo bara ráfa um.
Um síðustu helgi fór ég þetta halloween dæmi í skólanum. Það voru rosalega fáir sem mættu, en það var voða gaman. Ég fór í second hand búð daginn áður og fann Fridu Kahlo-legan kjól og ákvað að fara sem hún. Mér fannst mér takast nokkuð vel upp, þótt það hafi verið fólk þarna sem fattaði ekki hver ég væri. Sumir spurðu meira að segja "hver er það?"! Halló! Ótrúlegt alveg. En ég lofaði að setja inn mynd hérna...þá getiði dæmt sjálf hvernig mér tókst til.

JESS!!!

2008-11-07T08:05:00.001Z

Millifærslan er komin í gegn!

Strætóferð

2008-11-06T16:48:00.002Z

Ég er svo lánsöm að eiga heima rétt við T-bana stöð. Það gerir það að verkum að ég hef nánast ekkert notað strætóa hérna og þ.a.l. ekki kynnt mér strætó kerfið, enda einfaldast og þægilegast að fara með neðanjarðarlestinni. Um helgar gengur lestin allan sólarhringinn svo ég þarf heldur ekki að vesenast í leigubílum. Eitt kort gildir fyrir bæði lestarnar og strætóa svo samgöngur hérna er eins og best verður á kosið.
Í gær var ég á fundi með STARK, þar sem farið var yfir það sem er á döfinni og á eftir var svokallað slattapartý. Þá er tekið til áfengissafn félagsins og allar flöskur sem eru minna en hálffullar eru drukknar. Þetta var slatti af áfengi, en því miður allt tegundir sem eru ekki að seljast mjög vel á barnum (campari, konjak, absynthe o.fl, en líka vodki og gin o.s.frv.), svo ég drakk ekkert voðalega mikið. Eftir partýið fórum við niður á Gulu Villuna (stúdentapöbbinn) og drukkum einn bjór. Rétt fyrir eitt ákváðum við að fara heim í háttinn.
Þar sem lestarnar ganga allan sólarhringinn um helgar, þá var ég lítið að spá í tímanum. Það var bara eitt vandamál. Það var ekki helgi...það var miðvikudagur! Þegar við komum á stöðina var síðasta lestin farin...ónei! Sem betur fer vorum við með eina innfædda með okkur sem leiddi okkur á strætóstoppið. Hún fiktaði e-ð í símanum sínum og fann út hvernig við kæmumst heim til okkar. Strætóar ganga neflilega allan sólarhringinn. Ég hefði ekki haft efni á taxa svo ef Elin hefði ekki verið þarna, þá hefði ég örugglega bara beðið í 6 tíma eftir næstu lest! Það hefði ekki verið gaman! Við þurftum að bíða ansi lengi á hverri stöð og ég þurfti að skipta 2svar og ferðin tók allt of langan tíma. En á endanum komst ég heim. Án þess að þurfa að borga krónu (nema náttúrlega fyrir lestarkortið sem ég keypti fyrir mánuði síðan). Ég elska svona samgöngur!

Ég hef enn ekki fengið millifærsluna. Ég hætti þó við að brjóta e-ð þegar ég sá að þetta er farið út af reikningnum mínum heima. Seðlabankinn búinn að gera sitt greinilega...eftir 7 daga! Nú verður þetta bara að fara að birtast á sænska reikningnum mínum.
Hins vegar fékk ég yndislega sendingu með póstinum í morgnun sem innihélt gullfallegar evrur frá yndislegu foreldrum mínum. Ég gat því farið og borgað leiguna og keypt mér lestarkort.
Fór svo út í búð og keypti mér allt sem mig langaði í...eða svona næstum allt!

Það er Halloween pub á laugardaginn hjá STARK. Ég á ekkert til að fara í, lítinn pening til að kaupa e-ð og engin gömul föt til að endurnýta. Er einhver með hugmynd um hvað ég get gert?

Í dag þurfti ég að gera einn hlut!

2008-11-04T16:11:00.002Z

Ég þurfti að fara á einn stað til að taka stöðupróf í sænsku til að fá að byrja í kúrs. Kúrsarnir í háskólanum byrja ekki fyrr en í febrúar, svo mig langaði að byrja í einum kúrs núna og vera svolítið undirbúin fyrir háskólakúrsinn.
Ég fór og beit eftir viðtali. Svo tók ég prófið. Svo beið ég eftir öðru viðtali. Svo að lokum þurfti ég að bíða í einn og hálfan tíma eftir því að fá að skrá mig í kúrs. Þegar þangað var komið, kom það í ljós að sá kúrs sem ég gæti tekið, átti ekki að byrja fyrr en 5. janúar!!! Sá svart af pirringi og heyrði ekkert fyrir gaulandi görnum, því ég hafði bara étið smá morgunmat og hélt í alvöru að þetta myndi ekki taka þrjá og hálfan tíma!!
Ætlaði með flöskur í endurvinnslu. Langaði að kaupa mér e-ð annað að borða en það sem til er í ískápnum. Það er kalt og dimmt og ég nenni ekkert að labba út í búð með fulla poka af flöskum. Fer bara í fyrramálið. Millifærslan er líke ekki enn komin í gegn svo ég læt mér nægja það sem er til í ískápnum. Á ennþá sænska blóðmör með kanelbragði og margt fleira. Er ekkert að svelta. Það væri hins vegar ágætt að geta borgað leiguna. Kann illa við að skulda. Kreppan hefur áhrif á fleiri en bara okkur Íslendinga. Það er ekkert kósý við þessa kreppu. Það er fíla af henni!
Ef þetta verður ekki komið inn á morgun þá brýt ég e-ð!

A-B-C-D-E-F....

2008-11-01T12:19:00.002Z

Er loksins búin með heimaprófið :) Skilaði því á slaginu 10 í gærmorgun og í framhaldinu var bekknum boðið í göngu um "antikens stan". Fyrst fórum við á e-ð styttusafn sem er staðsett í konungshöllinni. Ég verð að viðurkenna að ég er ekki mikill aðdáandi endalausra marmarastyttna svo ég var ekki bergnumin yfir þessu. Höllin er samt voða fín. Þegar við komum inn á safnið var okkur boðið að geyma yfirhafnir og töskur í fatahenginu. Ég náttúrlega skildi allt mitt eftir þar og dreif mig inná safnið...sem var ííííískalt!! Ég hélt að ég myndi bara deyja. Fannst það alveg möguleiki. Svo talaði blessuð konan svo mikið um stytturnar að ég hélt að ég myndi ærast! En allt tekur enda um síðir og við yfirgáfum á endanum safnið og fórum að rölta um borgina að skoða skúlptúra og ýmsar byggingar með klassískum skreytingum. Það var líka frekar kalt úti og við röltum ekkert mikið...svo mér varð ennþá meira kalt. Veturinn er greinilega að koma!

Það var bara eitt sem stóð uppúr þessum túr. Við stoppuðum á einhverju torgi þar sem eru tvær styttur af hestum og húsin við torgið eru voða merkileg. Fólkinu sem gekk framhjá okkur fannst gædinn okkar greinilega ekki vera að sinna starfinu sínu mjög vel og á endanum kom til hennar maður sem fór að minna hana á alls konar upplýsingar sem hún yrði nú að segja okkur. Alir urðu frekar vandræðalegir...horfðu niður í götuna og reyndu að hlæja ekki. Svo hélt fyrirlesturinn áfram og konan hélt áfram að tala um þessa hesta og húsin og það allt...og þá kemur annar maður. Hann stendur við hliðina á henni lengi og virðist vera svolítið skrítinn. Allir eru voða mikið að reyna að horfa ekki á hann og það skapast mjög fyndið andrúmsloft. Maðurinn fer þá að tala við gædinn okkar og segja henni frá einhverjum herramannaklúbb sem er í einu húsanna og við komumst sko ekki þar inn nema strákarnir og þeir meiga taka eina stelpu með sér og bla bla bla. Allir hlæja mjög mikið! Ég er farin að hafa það á tilfinningunni að eldri svíjar séu mjög miklir besservisserar og kannski pínu ráðríkir!

En svo var túrinn búinn og við ákváðum að fá okkur hádegismat á veitingastað til að fagna próflokum. Mjög næs...en voðalega skrítið að vera búin með einn kúrs í lok október. Fórum á hádegishlaðborð. Það er rosalega sænskt að fara á hádegishlaðborð! Það bjóða flestir veitingastaðir uppá annað hvort hádegishlaðborð eða svona set menu í hádeginu. Borðaði algerlega á mig gat!!
Mér gekk ágætlega með þetta próf. Reyndar rosa vel að ég hélt þangað til ég fattaði að það átti að vera 1,5 línubil. Ég hafði verið með 2 bls auka og fannst það allt í lagi...en var svo allt í einu komin með 15 bls þegar ég var búin að laga línubilið...það máttu bara vera 8 bls! Svo ég þurfti að stytta og stytta og var ekkert voðalega ánægð með textann á endanum. Vona bara að ég fái sómasamlega einkunn. Bókstafaeinkunn í fyrsta sinn. Veit ekki hvort ég eigi eftir að skilja það almennilega.
Núna er ég komin í langt frí þangað til að ég byrja í næsta kúrs 7. nóv. Svo á ég líka að byrja á lokeverkefninu mínu núna...jíííhaaa!

Sterling farið á hausinn

2008-10-29T19:11:00.002Z

Núna fer ég rétt bráðum að þykjast vera e-ð annað en Íslendingur...segi bara að ég sé þýsk héðan í frá! Flugfélagið sem endilega þurfti að vera í eigu kapítalískra Íslendinga er farið á hausinn. Fullt af fólki strandglópar út um allar trissur og fullt af fólki fær ekki miðana sína endurgreidda. Ég ætla samt að vona að þetta reddist nú, þar sem Pétur og Dögg voru búin að kaupa handa mér miða til Köben í lok nóvember...með Sterling. Fokk fokk fokk! Mig langar til Köben >:(

Kannski ekki alveg fullt!

2008-10-28T13:05:00.002Z

Ég lofaði víst alveg fullt af bloggum þessa vikuna....er kannski ekki alveg að standa við það en ég er samt búin að vera dugleg að flakka á netinu og gera margt annað en að læra!
Það gengur samt alveg ágætlega. Stundum vildi ég að það væri hægt að prenta út fæla beint úr heilanum á manni, því ég er með fullkomna hugmynd af verkefninu þarna uppi, en það tekur bara svooo langan tíma að fara í gegnum heimildir og vesenast til að koma þessu niður á blað.
Ég skila á föstudagsmorgun og eftir það ætlar kennarinn í kúrsinum að fara með okkur í borgarrölt.
Annars er ekkert að frétta. Ég held að millifærslan reddist...þetta reddast alltaf...ekki satt??

21. október???

2008-10-21T19:43:00.002Z

Vá hvað tíminn líður hratt! Lokaprófið hefst á föstudaginn og mun það taka heila viku!! Hef ekki hugynd um við hverju á að búast. Krossa bara fingur.

En ég var að setja inn myndir frá helginni. Fórum á Októberfest í skólanum á föstudag og svo kvöldið eftir kenndi Yumiko okkur að búa til Sushi. Við skemmtum okkur rosa vel og sushi-ið smakkaðist hrikalega vel! Ég leyfði stelpunum að hlusta á íslenska tónlist sem þær fíluðu bara vel, Yumiko fékk að þýða fyrir mig textann að Juliette 1 og 2 með Ske og ég hélt að ég væri að láta hana hlusta á e-ð hrikalega dónalegt, en lögin eru bæði alveg hrikalega væmin ástarlög. Einhver sagði mér einhverntíma að textarnir á þessum lögum væru bara söfn af ljótum orðum á japönsku, en nei...þessi einhver var bara að ljúga að mér!

Næst á dagskrá hjá mér er að læra og læra og læra þannig að þið megið búast við fullt af bloggum!

Öland

2008-10-17T10:51:00.003Z

Kom heim í gærkveldi og nennti engan veginn að blogga.
Öland var algjört æði. Set inn myndir á picasa og mögulega facebook líka fljótlega. Við skoðuðum alveg ægilega mikið af fornleifum á daginn og svo var eldamennska og partý í eldhúsinu á kvöldin. Ég lét plata mig í að taka þátt í STARK sem er félag fornleifafræðinema hérna. Þá verð ég með í að skipuleggja og vinna í ýmsum uppákomum á vegum félagsins. T.d. á ég að vinna á barnum á Októberfest í kvöld. Það verður áhugavert!

Mér finnst fornleifafræði í Svíþjóð alveg svakalega áhugaverð. Hér er mikil umræða í gangi um allt mögulegt og margar mismunandi kenningar í gangi um alls konar málefni. Það er líka almennt álitið gott að fólk komi með nýjar kenningar um fornleifafræðina og fólki finnst gaman að ræða þær fram og aftur. Það engum hegnt fyrir að koma með djarfar hugmyndir og aftur fer enginn í rokna fílu útaf því að fólk er ekki sammála honum. Það er ekkert rétt eða rangt hérna. Umræðan fer í hringi.
Það er gaman.

Update kl 15. Búin að setja inn myndir á Picasa. Kíkið á myndir 1.

Vöknuð snemma...

2008-10-13T04:53:00.002Z

...því ég er að fara í 4 daga ferð til Ölands ligga ligga lái!! Það verður stuð! Segi frá á fimmtudagskvöld.
óver end át.

Sjitt

2008-10-10T17:07:00.004Z

Var að fá póst frá SÍNE þar sem var linkur á facebook síðu þeirra. Þar eru skilaboð frá Íslenskum námsmönnum víða um heim sem geta ekki millifært peningana sína yfir á erlenda reikninga og geta heldur ekki tekið út peninga af íslenskum reikningum. Ég er seif þennan mánuð og ef þetta verður ekki komið í lag þann 27. október nk. þá mun ég koma til með að verða rosalega rosalega mikið reið!!!
Að heimska og græðgi nokkurra bjána komi til með að hafa svona hræðileg áhrif á framtíð fólks, sem hafði ekkert að gera með alla þessa fjármálavitleysu, er bara svo ósanngjarnt að það eru bara ekki til orð yfir það!!
Seðlabankastjóri var nokkrum skrefum á undan mér í öryggishliðinu á Leifstöð þegar ég fór út...ég hefði nú átt að segja e-ð við hann. Hey Dabbi...ég er sko að fara út í nám...reddaru mér ekki??? Yeah right!

Mar spyr sig...

Update klukkutíma síðar:
Þessi bölvuðu fjármál fá mig svo til að gleima algerlega að segja frá hinum stórkostlegu gleði tíðindum sem ég fékk að vita í dag. Ég er komin með lokaverkefni!! Ég hélt fyrst að ég myndi ekki byrja að vinna að þessu fyrr en á seinna árinu, en það kom í ljós þegar við komum út að við áttum að byrja að skrifa í nóvember og skila fyrsta hlutanum þann 20. janúar. Ég hafði mestan áhuga á jarðvegsgreiningum og fékk í dag upplýsingar um það sem ég á að fjalla um í mastersritgerðinni. Ég sumsé fæ jarðvegssýni frá Birka. Úr húsi frá víkingaöld (um 900 e.kr.) og á að fleyta þeim, gera allskonar prófanir á þeim (fosfat, Ph og atomic absorption spectroscopy) og reyna með því að finna út hvurs konar hús þetta var. Ég byrja í nóvember að fræðast um allar þessar aðferðir og skrifa fyrstu kaflana.
Mér finnst þetta alveg hrikalega spennandi! Finnst ykkur það ekki?

Að maður skuli leyfa þessum fjármálum að eyðileggja svona spennandi dag...ótrúlegt!

Hejsan!

2008-10-07T14:51:00.002Z

Sænskunámið er komið á skrið. Er sko með skothellt plan um að læra sænsku fyrir jól! Er neflilega með Harry Potter á hljóðbókum og komin vel á veg með fyrstu bókina. Hlusta alltaf í lestinni og svo áður en ég sofna á kvöldin. Það er reyndar eitt sem fer ógurlega í taugarnar á mér. Sænskur hreimur á ensku er frekar kjánalegur, og sérstaklega þegar maður er vanur að heyra öll nöfn og staðarheiti í HP borin fram á ensku þá er sænski bómullarhreimurinn frekar pirrandi. T.d. heitir "Hermæóní" "Hermíóní" á sænsku og "Slytherin" er "Slæterinn". Veit ekki alveg af hverju en ég næ að láta þetta fara mikið í taugarnar á mér.
Ég hef náttúrlega lesið þessar bækur á ensku, svo það er ekkert mál að skilja þær sænsku. Svo þegar ég er búin með Harry, þá á ég til bækur eftir Camillu Läckberg og Lizu Marklund. Þegar ég er búin að hlusta á þetta allt saman verð ég örugglega orðin reiprennandi á sænsku!
Annars gengur þetta ágætlega bara þrátt fyrir að ég er ekki að taka neina sænskukúrsa. Skil mest allt...verð bara að vera duglegri við að reyna að tala. Ætla samt að tékka á kúrsum. Heyrði að innflytjendur ættu rétt á ókeypis sænskukennslu...mjög sniðugt!

Annars heyri ég að það sé allt að fara til fjandans heima! Viðurkenni það að það fór nú svolítið um mig að sjá skjálfandi ráðherra og fyrrverandi ráðherra í viðtölum í fréttunum í gær. Er búin að fylgjast frekar vel með og veit bara ekki hvað skal segja. Maður vissi náttúrlega alltaf að það myndi e-ð gerast. En svona mikið óraði mann aldrei fyrir. Vona bara að þetta fari nú allt vel að lokum og fólk missi ekki algjörlega æruna!

Ég ætla að elda hræódýra grænmetissúpu í tilefni krónunnar í kvöld. Með lauk og rótargrænmeti og engifer og hvítlauk. Hér er uppskerutíð svo flest grænmeti á spottprís! Verði mér að góðu!

Netbanki fretbanki

2008-10-01T15:16:00.002Z

Ég ætlaði að flytja sænskar krónur af reikningnum mínum hjá ríkisbankanum yfir á nýja fína sænska reikninginn minn og það er búið að taka mig núna hátt á aðra klukkustund. Maður þarf að pikka inn endalaust af tölum og heimilisföngum og netföngum og öllu mögulegu. Svo þegar maður er kominn á skref 43 af 57 (ekki raunverulegar tölur en næstum því) þá kemur melding: "ekki hefur verið slegið inn rétt heimilisfang sendanda reyndu aftur". Þá byrjar maður upp á nýtt. Svo þegar maður er búin með öll 487 skrefin þá kemur: "ekki var hægt að framkvæma greiðsluna þar sem ekki er næg innistæða á reikningnum". Ó...átti ég að gera ráð fyrir kostnaðinum? Þá verð ég bara að millifæra aðeins minna og BYRJA AFTUR!!! Farin að gnísta tönnum og svitna á tánum.

Ég vildi óska þess að ég gæti bara sest fyrir framan tölvuna mína, baðað út öllum öngum og æpt: "Gemmér monníííí" og þá myndu seðlarnir svífa útúr cd-drifinu eins og enginn væri morgundagurinn. Þá yrði ég hamingjusöm.

Það gleður mig þó að þegar ég kom heim þá var Yumiko búin að baka muffins. Það skemmtilegasta sem hún gerir er að baka. Ég er frekar heppin með meðleigjendur!

Bankareikningur!!!

2008-09-29T21:21:00.003Z

Ég hef ekkert að segja, en get þó ekki haldið mig við efnið, sem er að lesa og rýna í bókina Romano-British Coin Hoards. Lítill og stuttur pési, bara 60 blaðsíður, en ég bara nenni ekki!
Ég náði að stofna bankareikning í dag. SEB bankinn varð fyrir valinu sökum þess að það var eini bankinn sem ég gat opnað reikning í...go figure! Svíjar taka manni ekki beinlínis opnum örmum hérna. Maður þarf að vesenast heilmikið! En nú þarf ég ekki framar að umreikna allt yfir í íslenskt og svitna yfir því hvað allt er dýrt. Léttir.

Fékk frábærar fréttir að heiman áðan. Skoffínið Rektor fór á sýningu í gær og eftir að hann hafði unnið sinn flokk, vann hann besta rakka tegundar. Þá fór hann og vann besta hund tegundar. Svo fékk hann tvö meistarastig, alþjóðlegt og íslenskt og á eftir því fór hann í tegundahóp og vann sinn hóp. Þá fór hann í Best in show en þar lauk keppni. Hann er náttúrlega flottastur!

Skoffín!

Bjölluvegur

2008-09-24T20:38:00.006Z

Jæja er ekki kominn tími á myndablogg?? Ég er bara með símann minn hérna úti, svo ég biðst afsökunar á litlum gæðum.

Í Stokkhólmi er greinilega mikið um hnupl.

En þarf bara að vara fólk sem skilur þetta letur við. Þessi skilti eru víða um borgina en þetta var það fyrsta sem við rákum augun í á flugvellinum :D

Haustið er komið í Svíþjóð. Það var hrikalega kalt fyrstu vikuna, aðeins skárra þá næstu, en í þessari vikur er búið að vera dásamlegt!
Haustlitirnir við deildina eru geggjaðir!

Svo er þetta Wallenberger Laboratoriet, þar sem fornleifafræðin er kennd.

Veit ekki hver var að þvælast þarna fyrir.

Svo var ég víst einhverntíma búin að lofa myndum af heimilinu. Þetta er sumsé húsið:

Herbergið mitt er á neðri hæðinni og glugginn minn er lengst til vinstri. Eldhúsið er við hliðina.
Og svo inni í herberginu:

Af Bjölluvegi er annars bara allt gott að frétta. Við Gugga fórum á fornleifafræðidjamm um síðustu helgi og gátum aðeins slett úr klaufunum. Lestin gengur allan sólarhringinn, svo ég tók bara lestina heim þegar tíminn var kominn.
Við Yumiko vorum að tala um tilviljanir og þennan litla heim um daginn og hún sagði mér frá því þegar hún hitti fyrir tilviljun fyrrverandi bekkjafélaga í neðanjarðarlestinni í Tokyo. Henni fannst þetta rosaleg tilviljun þrátt fyrir að vera frá sömu borg og fyrrverandi bekkjafélaginn. Mér fannst þetta ekkert tiltökumál en seinna sagði hún mér meira um þetta lestarkerfi og þá skildi ég hversu erfitt það er að hitta einhvern sem maður þekkir þarna!

Þetta er fáránlegt! Ég spurði hvernig hún gæti tekið þessar lestir og hún svaraði á hæverskan máta: "þetta venst"!!!

Það verður mikið að gera hjá mér næstu daga. Þarf að lesa ferlega mikið og svo vonast ég til þess að geta mætt á Skype-saumaklúbb í Hveró á morgun...er ekki tæknin dásamleg??

Fylltur kúrbítur

2008-09-16T19:21:00.003Z

Ég fór í mitt fyrsta "seminar" í morgun. Við áttum að vera búin að lesa þrjár greinar og svo ræða þær og gagnrýna. Þetta gekk frekar illa hjá mér. Það er mun erfiðara en ég hélt að lesa greinar á ensku, hugsa um þær á íslensku og eiga svo að fylgja umræðum um þær á sænsku. Við máttum alveg tala ensku, en það var bara svo erfitt að fylgjast með þessu og koma sér inn í umræðurnar. En ég er búin að ákveða það að velta mér ekki uppúr þessu, heldur bara gera betur næst :o/

Ég er frekar dugleg að elda mér hérna, frekar en að fara að sækja mér take away. Mjög stolt af mér. Það gerir það líka auðveldara að stelpurnar eru líka alltaf eldandi, svo við erum yfirleitt allar saman að elda...spá í því hvað hver önnur er að elda og skiptast á hugmyndum og "tips"um. Virkilega skemmtilegt!
Ég fékk einhverntíma í sumar fylltan kúrbít á Hótel Heklu og mig langaði að prófa að gera svoleiðis og í kvöld...eftir þennan erfiða morgun ákvað ég að drífa í því. Þetta var þvílíkt gott og mér finnst ég verða að deila þessu með umheiminum.
Ok ég skar kúrbít langsum í helminga, setti annan helminginn í ískápinn (því ég er jú bara ein og þá dugar mér alveg hálfur kúrbítur). Svo skar ég innan úr honum kjötið(það var reyndar pínu flókið og ég skar nokkrum sinnum í gegnum hýðið en það var allt í lagi) og skar það niður. Ég sauð smá bulgur og steikti með niðurskorna kúrbítnum og 1 hvítlauksrifi á pönnu uppúr ólífuolíu. Svo kryddaði ég jukkið með salti, pipar og chili og kreisti hálft lime yfir. Svo setti ég pínu matreiðslurjóma útí og fyllti svo tóma kúrbítinn með þessu. Svo setti ég smá rifinn ost yfir og henti þessu inn í ofn. Jummí...rosa gott!! Geri þetta sko aftur!

Nýtt af nálinni

2008-09-12T15:59:00.002Z

Ég á að vera að lesa greinina The osteological paradox,svo ég ákvað að laga aðeins til á blogginu mínu! Hvernig lýst ykkur á? Sænsku fánalitirnir fá að njóta sín.
Ég prófa þetta svona í smá tíma. Svo kannski breyti ég...hver veit...
Svo er ég búin að breyta til í herberginu mínu aðeins. Mér fannst þetta vera aðeins of þunglamalegt og dimmt, svo í ákvað að taka niður fullt af drasli, setja það í kassa og inn í skáp! Miklu betra núna. Tek kannski myndir bráðlega og set inn...

Orðin útlendingur

2008-09-08T21:37:00.002Z

Jæja...þá er það skýrslan! Ég er komin út, búin að koma mér fyrir og lýst bara ágætlega á mig.
Það var hræðilega erfitt að þurfa að kveðja Óskar á flugvellinum, langaði bara að smygla honum með...það voru alveg laus sæti í vélinni og allt..hefði kannski getað laumað honum undir kápuna! En nei nei...hann kemur bara seinna. Svo kem ég um jólin og svo skiptumst við á að ferðast á milli. En við eigum voða bágt :(
Þegar ég kom til Stokkhólms gekk allt frekar snuðrulaust fyrir sig. Hún Gugga er hérna líka, líka að læra Laboratoriv Arkeologi, svo við getum flækst um saman að leita að hinu og þessu. Við erum búnar að fara í skólann og kynna okkur deildina og lýst bara vel á. Held að tungumálaörðuleikar verði minna mál þar sem flestir virðast alveg nenna að skilja samblandað skandinavískt babl. Við fórum líka að sækja um kennitölu, og þegar við fáum hana, þá ættum við að vera færar í flestann sjó!
Ég er líka ferlega heppin með húsnæði finnst mér. Er í litlu herbergi, en mjög vel skipulögðu svo að þar inni rúmast rúm, sófi, lítið skrifborð, skápur, borð, sjónvarp hilla og fataskápur!! Rúmið er mjög háfætt (svona efri koja) og það er sófi fyrir neðan það. Þetta er ferlega kósí! Þannig að ef einhver er að spá í að heimsækja mig, þá er nóg pláss í herberginu...komiði bara sem oftast :)
Ég leigi með tveim öðrum stelpum. Ein er frá Japan og er súper kurteis og hlédræg, en virðist við frekari kynni, vera bara nokkuð fín. Hin er þýsk, kom í dag og virist vera bara fín líka. Hún er mun framhleypnari en sú japanska, og talar mjög mikið og með mjög amerískum hreim. Ekki þessi týpíska þýska stelpa sem ég var búin að ímynda mér.
Ég bý í voða sætri 2ja hæða blokk sem er staðsett í mjög sætu grónu hverfi. Það er örstutt í Tunnel banan, sem er helsta samgönguæðin hér í borg svo þetta er bara allt í fínu lagi.
Svo reddaðist þráðlausa internetið í dag (við þurftum að kaupa router því við vrum bara með módem). Svo ég get talað á skype og horft framan í fólk.

En þetta fer sumsé vel af stað. Nenni varla að blogga meira núna...blogga örugglega næst þegar ég þarf að læra e-ð...

Ætlar þú að horfa á leikinn???

2008-08-24T11:42:00.002Z

Spurning sem maður er búinn að þurfa að svara of oft síðustu daga. Maður er alveg með kjánahroll yfir þjóðernisrembingnum. Það eru allir að verða geðveikir! Meira að segja ég þurfti að fíflast til að vakna fyrir þessa vitleysu á þessum annars fína sunnudega. Þeir unnu silfur...það er nú aldeilis stórgott og ég búin að troða mig út af bústi og steiktum eggjum. Fínn dagur.

Svo eru það 2 vikur í að ég fari út. 6. sept er dagurinn sem svartnættið mun hellast yfir land og þjóð. Ég er að flytja að heiman.

Um að gera að panta tíma sem fyrst!

Afsakanir, afsakanir, afsakanir...

2008-07-31T22:14:00.002Z

Er ekkert ógeðslega dugleg við að hanga á netinu þetta sumarið. Það er nú líklega bara ekkrt slæmt. Eiginlega frekar gott...maður eyðir allt allt of miklum tíma í þetta apparat.

En ég er stödd á Skeiðunum. Gref á Þjótanda á daginn og lifi lúxuslífi á kvöldin. Fitna og fitna og get ekkert að því gert.
Svo er ég komin inn í Stokkhólmsháskóla og mun læra þar til meistaraprófs í svokallaðri "Laboratoriv arkeologi". Ofsa ofsa spennó.
Ég er voðalega andlaus og nenni ekki að tjá mig um eitt né neitt. Enda getur það verið hreint og beint hættulegt á þessum tímum. Já maður getur jafnvel misst æruna. Og það viljum við ekki ónei ónei.

Fórum í ferðalag í gær. Keyrðum alla leið á Hveravelli í sumarblíðunni komum svo við í bakaleiðinni og skoðuðum Skipholtskrók, þar sem musterisriddararnir földu hinn heilaga kaleik á sínum tíma. Veit ekki hvað er til í þessu hjá þeim, en það er vissulega mjög gaman að þessu, og til þess er leikurinn gerður...eða hvað?
Svo keyrðum við inn í Hvítárnes. Dásamlegur blettur sem ég ætla að heimsækja aftur og eiga þar góðar stundir. Sé það alveg fyrir mér...grill fyrir utan skálann...einhver út í glugga uppí risi...fólk niðri við vatn að veiða...allir með bros á vör, baðaðir einhverri draumkenndri birtu...þetta verður dásamlegt!

Kannski að veðurblíðan liti eitthvað þessa upplifun, en ég er orðin soldið veik fyrir að skoða þetta hálendi eitthvað frekar.

Hlakka bara soldið til.

What's on Hornafjörður!

2008-06-28T00:02:00.002Z

Núna bý ég á Höfn yfir helgina. Þetta sumar virðist ætla að einkennast af miklum flutningum. Við búum núna í Nesjahverfi, en þurftum að flytja á Höfn yfir helgina vegna þess að e-ð fólk þurfti að fara að gifta sig. Það er nú allt í lagi. Fengum lánað hús með útsýni yfir jökulinn og svo er það í götu sem heitir því skemmtilega nafni Júllatún (núna skelltuði uppúr, en þetta er alveg satt...gatan heitir þetta)!

Við erum búin að grafa í viku núna og erum búin að finna óttalega fín hús frá víkingaöld. Ægilega gaman allt saman, nema það hefur verið frekar kalt síðustu daga. Það rætist úr því...það er ég viss um. Við eigum 2 vikur eftir hérna og ég er viss um að það komi bikíníveður á einhverjum tímapunkti...það hlýtur bara að vera!

Svo er það bara Humarhátíð á Höfn um næstu helgi. Loksins ætla ég að prófa það dæmi. Heyrði fyrst af þeirri hátíð hjá henni Örnu* í 1. bekk í ML. Ætla pottþétt að fá mér sóðalega og djúsí humarloku (það bara getur ekki verið vont).

Á kaffihorni...

2008-06-13T21:50:00.002Z

Það er svo yndislegt að heyra glamrið í múrskeiðum og einhver að kalla upp random tölur af hæðamælinum. Við höfum verið frekar óheppin með veður. Það rigndi eins og ég veit ekki hvað fyrstu dagana og rústin alltaf full að vatni...ekki gaman!!
Svo fengum við þrjá góða daga og svo á að rigna aftur á mánudag. En jæja, við erum þó búin að finna ýmislegt og nógur tími eftir til að fina meira.

Erum á Höfn núna. Vorum rekin úr húsi yfir nóttina en snúum aftur á Fagurhólsmýri á morgun. Komum í bæinn um næstu helgi...vona ég...maður veit þó aldrei...
Mikið gaman að vera útí sveit!

Fer á morgun!!

2008-06-02T17:18:00.005Z

Ég fer á morgun í Öræfasveit...blogga ekki um einhvert skeið.

Útsýnið frá fagurhólsmýri er ekkert slor.

Daglegt líf í tjaldinu.

Séð að "Bæ"

Hlakka til! Sjáumst...

Svo róleg og yfirveguð...

2008-05-30T17:57:00.002Z

...eða kannski bara dofin og fattlaus!
Ég var í Ringlunni í gær að dóla mér og taka mér pásu frá allri sólinni. Ég var hin rólegasta þrátt fyrir að allt hafi leikið á reiðiskjálfi. Kippti mér sko ekki upp við svona ræfilsskjálfta...fann ekki einu sinni fyrir honum.
Ég tók þó eftir ákveðnum skapbreytingum á fólkinu í kring um mig. Allt í einu voru allir orðnir svaka æstir og hópuðu sig saman og töluðu æstum rómi. Ég heyrði eitthvað muldur út frá mér að "þetta væri bara eins og 17. júní". "Nei var þessi ekki stærri?" heyrði ég svo. Skildi nákvæmlega ekkert í því sem fólkið var að segja. Fór svo á kassann til að borga það lítilræði sem ég var búin að sanka að mér. Á meðan þær afgreiddu mig hlustaði ég á aðra afgreiðslustúlkuna gefa hinni fyrirlestur um jarðskorpuhreyfingar og eldgos. Mjög áhugaverður fyrirlestur en ekki gat ég skilið af hverju þær voru að blaðra um þetta á meðan þær áttu að vera að brosa framan í mig og bjóða mér poka.
Fór í næstu búð. Þar var sama sagan. Allt afgreiðslufólkið stóð í hóp og talaði um 17. júní...af einhverri undarlegri ástæðu. Enginn vildi aðstoða mig um val á skóreimum. Stuttu seinna hringði Óskar og sagði mér frá því að það hefði verið risa jarðskjálfti og allt væri í rúst á Selfossi og í Hveragerði og það hefði allt skolfið í vinnunni hjá honum. HA? "Ringlan stóð eins og klettur" sagði ég fullviss um að það hefði enginn tekið eftir þessu hérna. Þá loks fattaði ég hvað fólkið var allt að meina með þessum æsingi. "Skjálftinn fannst samt ekkert hérna var það?" spurði ég og fékk vægast sagt undarlegt augnaráð til baka. "Ljósin blikkuðu sko og það skalf hér allt eins og ég veit ekki hvað" sagði afgreiðsludaman og þótti ég afar einkennileg ung kona.
Æ ég er svolítið fegin því að vera stundum dofin og fattlaus. Það er ekki alveg uppáhaldið mitt að lenda í jarðskjálfta, svo það er ágætt að ég fann ekkert fyrir honum.
Heima á Selfossi var þó önnur saga. Þar fór allt út á gólf og allt í rúst. Húsið stendur þó og allir eru ómeiddir.

"If you want to become a really good archaeologist...

2008-05-29T14:29:00.003Z

...then get out of the library"

Þetta segir dr. Indiana Jones við enn nemenda sinn þegar hann nær að keyra mótorhjóli inn á bóksafnið í nýjustu myndinni sinni. Restin af myndinni fór í að leita að forsögulegum geimverum á Amazon svæðinu.
Það er svo stórkostlegt hversu nálægt raunveruleikanum þeir ná alltaf að vera. Ég lendi í mjög svipuðum aðstæðum á hverju sumri. Hver stund er þrungin spennu og hasar.
Get ekki beðið eftir að fara að skófla upp vikri, berjast við flugur, verða hundblaut í grenjandi rigningu, fara í störukeppni við ófrítt öræfafé, fylgjast með dysiláa í deninu og svo verður það auðvitað ávallt mikil spenna yfir því hvað trukkafæðið býður uppá á hverju sinni.

Glæsilegur endasprettur

2008-05-25T22:21:00.002Z

Í annars frekar óspennandi atkvæðagreiðslu ætlaði allt um koll að keyra í blálokin þegar við fengum loksins 12 stigin langþráðu frá Dönum. Svekkelsi var þó að Barbíparið fékk ekki að fagna því í beinni.
Mér finnst 14. sætið vera bara þannig séð ok. Það slökkti þó svolítið á stemmaranum að heyra aldrei "Islande deux points" eða e-ð þannig. Ég er alls ekki sátt við rússneska lagið. Það er bara drepleiðinlegt ef maður á að segja alveg eins og er. Mér fannst Bosnía-Herzegovína með besta lagið og svo voru Frakkarnir alveg rosalega kúl.

Allavega...er hætt að vinna á leikskóla og er komin í rúmlega viku frí áður en ég held í uppgröft. Í fríinu ætla ég að ditta að og rækta garðinn, synda einhver ósköp, taka til, versla, þvo þvott og undirbúa mig fyrir sumarið.

Það verður ljúft.

Hinn vikulegi pistill

2008-05-16T21:43:00.002Z

Það er ekki mikið um færslur á þessu bloggi. Enda höfundurinn ekki í prófum, stendur ekki í ritgerða- og verkefnaskilum og er bara ekki nógu involveruð í það sem er að gerast í heiminum í dag.
Þetta lagast í haust...þ.e.a.s. ef ég kemst inn í Stokkhólm.
En ég veit eitt um heiminn í dag! Júróvisjón er í næstu viku!!!! Ég hef svosum enga trú á laginu okkar. Mér finnst þau bara of típísk. En djö.... skal ég verða hoppandi rúllandi reið ef sænska sílíkon beljan hún Charlotte Nilson vinnur!!! Það náttúrlega á ekki að gerast. Hún er með glatað lag!
Af þeim lögum sem ég hef heyrt finnst mér Króatía best. Eða voru það ekki annars gömlu krúttlegu kallarnir? Svo er Kýpur líka í lagi. Mér finnst asnalegt að það sé bara sýnt úr okkar undankeppni í þættinum þarna á RÚV. Næst ættu þeir að eyða aðeins minna púðri í undankeppnina heima og aðeins meira í kynningarþætti um keppnina úti!

Annars langar mig að koma því á framfæri hversu mikið ég elska þáttinn Svalbarða sem er sýndur á föstudögum á Skjá Einum. Það er allt gott við þessa þætti. Æðisleg tónlist og frábær húmor :)

Hitt og þetta

2008-05-09T20:49:00.002Z

Dagurinn í dag var erfiður dagur. Ég hafði fengið frí í vinnunni til að fara í mikinn leiðangur norður á strandir til að leita að löngu horfnum skipsflökum ásamt hóp af mikilmennum (eða miklum mönnum?). Svo fór það allt í graut því veðurspáin var bara ekki vitundar ögn vænleg til vinnings. Ein stelpan á leikskólanum virtist vera alveg með þessa spá á hreinu þegar ég spurði hana hvort hún ætlaði í eitthvað ferðalag um helgina. Hún svaraði: "Nei við og pabbi og mamma ætlum bara að vera inni því að er ekkert skemmtilegt í þessari veðurspá. Hún er bara mjög leiðinleg". Gott að hafa hlutina á hreinu þegar maður er þriggja og hálfs.
Allavega...þá var skyndilega þessi þriggja daga helgi orðin algjörlega óskipulögð. Ef það er eitthvað sem ég þoli ekki, á eru það óskipulagðar helgar. Nenni ekki að gera ekki neitt. Hringdi því í systur mína og stakk hún upp á drykk á öldurhúsi. Mér fannst það náttúrlega alveg upplagt og sagði henni að ég myndi fara í ríkið og kaupa sunnlenskan bjór sem við myndum sötra á áður en við færum á knæpuna. Þegar ég lagði á (sem á ekki við í dag því maður leggur ekki á með gsm) tæmdist hugurinn á mér á undarlega miklum hraða og ég mundi ekkert af því sem ég sagði systur minni, gekk beinustu leið heim, lagðist með blöðin uppí rúm og dottaði í 2 tíma!!! Gleymdi gersamlega ríkinu! Ég er nú lélega fyllibyttan. Bót er þó í máli að ég er alltaf einstaklega dugleg við að nýta tollinn og á því ávallt birgðir af áfengum veigum...bara engan bjór. Svo nú sit ég og bíð eftir systurinni og horfi á Svalbarða, södd og sæl eftir u.þ.b. bestu máltíð í heimi! Við Óskar erum orðin algerlega húkt á Ban Thai. Höfum alltaf pantað okkur nýjan og nýjan rétt og það er alltaf besti tælenski rétturinn sem við höfum smakkað. Þetta er besti tælenski matur sem ég hef smakkað...bæ far! Ég er líka ekkert svo viss um að það finnist betri tælenskur matur á Tælandi. Ég hugsa að ég myndi ekki kaupa það. Ef það væri eitthvað sem fengi mig til þess að elska þá eitthvað meira, þá myndu þeir flytja sig um sess yfir í vesturbæinn...og kannski stækka hjá sér take-out seðilinn.

MMmmmmmm...namminamminammi...

Einu sinni bjó ég í Belfast...

2008-04-29T22:00:00.002Z

...en ég sá aldrei móðursjúkar löggur hrópandi "GAS" í átt að saklausum borgurum. Það heyrir sögunni til. Vona nú að löggan hér á landi fari að læra sína lexíu og hætti að framleiða kjánhroll í hjörtum landsmanna.

Sumardaginn fyrsta, var mér gefin kista...

2008-04-22T18:59:00.003Z

...styttuband og stútur, mosóttur hrútur...

Ég man þegar ég var lítill skáti á Selfossi og þurfti að fara í skrúðgöngu á sumardaginn fyrsta. Þá átti maður náttúrlega að vera í skátapeysunni og með klút og alles. En alltaf var rigning, oftast var rok og stundum var slydda. Ég man líka eftir einhverjum snjó. Móður minni fannst þunn bómullarpeysan sko ekki nógu klæðileg í svona veður og fengum við að klæða okkur í að minnsta kosti 5 lög af hlýindisfatnaði innan undir. Kosturinn var að manni varð alla vega ekki kalt, ókosturinn klárlega sá að maður var ekki sérlega töff. Reyndar var maður kannski búinn að útiloka töffaraskapinn með því að vera staddur í einhverri skátaskrúðgöngu.
Svo gekk maður í takt út um allan bæinn og passaði að hafa jafnt bil á milli sín og næsta manns.

Vinstri - bomm - vinstri - bomm - vinstri - hægri - vinstri - bomm

nostalgía...mmmm...

Jinx

2008-04-13T19:44:00.002Z

Ókei ókei það er ekki komið vor, alls ekki komið sumar og alltof alltof langt í að maður getur farið að slappa af og sleikja sólina. Stundum gleymir maður bara upprunanum í smá stund og heldur að maður búi í einhverju almennilegu landi þar sem árstíðaskiptin eru skýr og ekkert vesen. Þegar vorið er komið, þá er bara orðið hlýtt og bráðum kemur sumar og þá er bara orðið heitt! En nei, við búum víst á Íslandi, þar sem snjóar langt fram á sumar og svo koma dagar inná milli þar sem sólin skýn svo skært að maður heldur bara að maður geti skellt sér í sandala og ermalausan bol!
Ég verð að viðurkenna að í gær fékk ég bjarsýniskast. Sólin skein og ég rölti mér niður í bæ í gallajakka og sumarskapi. Augnablik gleymdi ég því að ég er Íslendingur og á þessu augnabliki, náði ég að rölta mér heim aftur og taka þykku mokkakápuna mína, alla stóru treflana mína (þó ekki húfuna) og troða því oní poka sem svo fer með tíð og tíma útí geymslu þar sem hann fær að sitja af sér sumarið. Sem betur fer var pokinn ekki farinn út í geymslu, því þetta jinxaðist allt saman í rugl og það fór að snjóa um kvöldið og þá mundi ég aftur hvar ég á heima.

Fyrirgefið kæru landsmenn og konur...ég tek á mig fulla ábyrgð á þessu fannfergi öllu saman.

Meistari Inga

2008-04-08T20:57:00.002Z

Ég sendi umsókn mína um meistaranám í Svíaríki í póst í dag. Hún ætti að berast Svíum á föstudaginn segir konan á póstinum.
Kannski verð ég því þotin af landi brott í lok ágúst/byrjun september.
Ég verð því að æfa mig vel í að prata svenska...bra bra bra

bra bra bra...

Rope-Yoga

2008-03-31T22:26:00.002Z

Eftir að hafa lesið blogg eins kollega míns ákvað ég að tékka á rope-yoga í baðhúsinu og skráði mig á námskeið. Hef stundað yoga áður og var þá einu sinni til tvisvar í viku og ákvað núna að taka þetta með trukki og skráði mig á námskeið þrisvar í viku!!! Heví aktíf! Svo var fysti tíminn í dag og æ mig auma. Þetta var miklu erfiðara en mig hefði nokkurn tíma grunað. Allir magavöðvar sem maður getur ímyndað sér og ekki ímyndað sér eru teknir í gegn. Ef ég verð ekki mössuð í hel með sex-pick á kantinum eftir þessar 8 vikur, þá verð ég illa svikin. Kvíði fyrir morgundeginum...held að hann verði erfiður...svona vöðvalega séð.

Páskar

2008-03-24T18:05:00.002Z

Jæja þá er Jesú enn eina ferðina búinn að deyja á krossi fyrir syndir mínar og rísa aftur upp frá dauðum í guðs nafni amen. Svo er ég líka búin að éta á mig gat.
Græðgi er ein af dauðasyndunum sjö og því bíð ég eftir að maðurinn með ljáinn komi og láti sína ásjónu lýsa yfir mig og sé mér ónáðugur.
Nei nei það er ekki svo slæmt. Auðvita er þetta akkúrrat rétti tíminn til að láta eins og asni, og syndga eins og enginn sé morgundagurinn, því Jesú er þarna að redda þessu. Ég píndist með honum á föstudaginn langa í alsherjar magakveisu sem hreinsaði iðrun af fyrri syndum. Því ákvað ég að álíta sem svo að það yrði í lagi að syndga smá meira og láta ofát verða höfuðsynd þessarar páskahátíðar.
Hvað getur maður svo sem gert þegar hverjum dýrindisréttinum er plantað fyrir framan mann?? Á maður bara að segja pent "nei takk ómögulega"? Neih...

...ekki séns!

14. mars

2008-03-14T19:19:00.002Z

Þennan dag árið 1879 horfði lítil mannvera fyrst dagsins ljós. Þessi manneskja átti eftir að gera margar stórkostlegar uppgörvanir á ævi sinni og hafa áhrif á líf svo margra. Þessi mannesjka var þekkt fyrir gífurlegar gáfur á sínu sviði...alveg ótrúlegar gáfur.

Þetta var að sjálfsögðu hinn sérkennilegi, en stórgáfaði Albert Einstein.

Hundrað og þremur árum síðar kom ég svo.

Hvur veit...kannski verður mitt nafn einhverntíma á Wikipedia og eftir 129 ár, stærir einhver 26 ára unglingur sig af því að vera fædd(ur) á sama degi og ég...og áðurnefndur Albert Einstein.

Ætla að fagna deginum með humaráti á ströndinni. Það verður eflaust gaman.

Blóm og kransar afþakkaðir :)

Linkar

2008-03-04T21:20:00.002Z

Bætti við link, breytti einum og eyddi einvherjum út, sem eru annaðhvort yfirlýst hættir að blogga, eða eru nokkuð augljóslega hættir að blogga.

Hef annars ekkert að segja...ég er kvefuð og mig langar alveg ofsalega mikið í ferðalag til Jórdaníu. Það held ég að myndi nú gleðja mig alveg svakalega mikið!

Fór í leikhús á laugardag. Er búin að vera alveg hrikalega dugleg við að fara í leikhús uppá síðkastið. Er hrædd um að núna sé ég hætt í bili, en þetta er búið að vera rosa gaman. Fór í þetta skiptið að sjá Baðstofuna, eftir Hugleik Dagson í Þjóðleikhúsinu. Verkið er sýnt í Kassanum, sem ég hef aldrei komið í áður. Það eru mjög misjafnar skoðanir á verkinu. Mér fannst það alveg geggjað! Ógeðslega fyndið og ógeðslega ógeðslegt. Sagan um græna manninn sem kemur útúr maganum á hvalreka og verður ástfanginn af vinnukonunni á bænum getur ekki verið súrari og það finnst mér gaman! Mæli með því að drífa sig! Þarna koma fyrir margar fleigar setningar og margir skrautlegir karakterar sem ég er ennþá að hristast af hlátri yfir og mig vantar svooo einhvern til að hlæja með!

Hlaupársdagur!!!

2008-02-29T19:18:00.003Z

Það er mér sönn ánægja að segja frá því að þetta er líkast til í fyrsta skiptið sem ég blogga á þessum mánaðardegi. Til hamingju með það kæru lesendur!

Þessi mánuður þaut framhjá eins og hans er von og vísa. Mikið er það ánægjulegt er það ekki? Þetta þýðir að sumarið er enn nær en það var í gær.

Ég held að þetta verði helgin sem ég nota í að láta mér leiðast. Held í alvöru að þetta sé í fyrsta skipti síðan um jólin að mér er ekki boðið í neitt partí og ekkert er planað. Svo að ætla að taka þessu bara létt, kannski glápi ég á sjónvarp fram eftir í kvöld...kannski fer ég á hundasýningu á morgun...ég fer reyndar pottþétt í leikhús annað kvöld (baðstofan í þjóðleikhúsinu)...kannski sef ég frameftir á sunnudaginn...kannski fer ég á selfoss...kannski ekki. Ætla bara að sjá til og slappa af.
Eru þessar stundir ekki orðnar nokkuð vandfundnar í dag? Maður planar allt of mikið. Svo verður maður pirraður ef maður er boðinn í eitthvað eftir mánuð, sem maður var þegar búinn að plana eitthvað annað. Þá fer maður að plana tímann sinn fyrir kvöldið: Sko ef ég fer kl 7 til Siggu, þá get ég verið farin þaðan kl 8.30 og verið komin svo til Magga kl 9 og svo get ég reynt að ná hinu liðinu á barnum kl 11 til að geta verið farin heim kl 1, því ég þarf að vakna kl 9 daginn eftir til að vera mætt á hinn staðinn kl. 10 og bla bla bla. Svona hypathetically...ég held að ég þekki örugglega enga Siggu og þessi Maggi er ekki til þó að vissulega þekki ég einn Magga.
Já maður á að njóta þess að gera ekki neitt...verða heimskur...það er voða góð tilfinning.

Njótið dagsins...eða kvöldsins...